चुपाल्छेला ल्होछाररि नोन
टुडिखेलरि म्राङजि
छार आउताररि पेङदोर्जे
थेह्राङबान मुबा डम्फु
थेह्राङबान मुबा तागि
थेह्राङबान मुबा सेलो भाका
थेह्राङबान मुबा बख्खु
रुस्लान भोडकाला याफ्लारि
तयार ताजि झिलिमिलि डाजाङ
आधुनिक जमानाला पेङदोर्जे
भोडका थुङबान स्याबा चुजि
स्याना स्यानान कुलाकि ताइजि
फिर्ना फिर्नान स्हुर्दाम ताइजि
रस्लानला सेम स्हुहाजि
रुस्लान द्रविभुत ताजि
ह्राङलान खोल डेसि
न्हानपिन्जि गा
ह्राङलान बिर्को तेसि
क्वान पिन्जि टोपि
स्याना स्यानान क्युइफुइजि पेङदोर्जे
भावुक ताजि रुस्लान
ङ्हेपिन्जि ह्राङदा पेङदोर्जेला सुङरि
डम्फुफिला चरि नोन
क्युइफुइसि स्याबारिन ख्लाजि
हाजिर ताजि चिटिक्का ताबा फुच्चे रुस्लान
ओम, थोबो छुम्जि चरिसे
रुस्लानला बिर्को तागि स्होसि
रुस्लानला डि गोरि रिल्सि
ल्हानान दुइ स्यासि चिजि ‘मोर्डन’ पेङदोर्जे
स्याना स्यानान
म्लेजि ताङसारला डि
म्लेजि आम्बुला सिङ
म्लेजि सेलोला ओन्माला काइ
म्लेजि ताम्सालिङ क्युरुरु
३२ किला केरेरे क्याबारि
म्लेजि लुङदाररि छोङ फोर्बारि
म्लेजि
माबार गाङला सिम्बा खासुन्हाङरि
मिख्लिसे ग्याम दाप्सि ब्रानचिबा माइच्याङ
म्लेजि लुङदार ब्यान्बा
साइलुङला ग्यार्जा लुङ
म्लेजि
साढे सताब्दि ङ्हि हेन्से मुतोबा म्हुन
तेमाल गाङनोन गाङ न्याय म्हाइबान
कोर्सि चिबा रेन्जेन दोर्जेला ब्ला
म्लेजि
दरबारला सयनकक्षरि
हतकडिरि खिसि
युगौहेन्से मुक्ति म्हाइचिबा
सुसारे मामला अस्थिपन्जर
म्लेजि
महाराजदा लेप्ना लाबारि
सिङ पुइना पुइनान सिङ दोबा
पिपा म्हेमेला राप
रुस्लानप्रति कृतज्ञ तासि
मिख्लि पुइजि पेङदोर्जेसे
रुस्लान ताङसि हापख्वाइजि
ओम ख्यापपिन्जि थेला कुरि
चम्किलो लोगो
थेलिच्छा काङ सारि आतानि पेङदोर्जेला
ब्याङपिन्जि डम्फु
ब्याङपिन्जि स्हुरदाम
लिखन्डिन डाजाङरि क्रेसि
ल्हागाब लाबा चुजि नारा–
‘ह्याङला रुस्लान जिन्दावाद !
रुस्लानसालिङ जिन्दावाद !’