ङा खाला हिन्ना
ङाला दातेदा म्लेसि
याखारगि सक्लो ल्हुइ सोबारि म्हाइला
ङ्योइबा पेरो तागाला ङाजा
होइ सोबारि खानाङ देबा मुला– फकिर
बिले– ग्रेन समुन्द्र
थोला ह्राङ्रिन स्हु्
फ्याङ्ला पोसि लि खासु
मु थुर्बारि
ताइला प्रुत
डुइला थेनोन ल्हुइ ।
ल्हुइ, सातान म्हेन्दोला फोले आताबाचिम
खाराङ लासि म्हेन्दो ताइबा थेन सार्बा टुङ्गो आता
तासाम, जेक्खे गिक्खे संयोग
आतासाम नोन गिक्खे ल्हुइ
होइ फकिर
ओस्सोन तिलाला पिर सुर्ता
घडिला पलारि गाबा मुला ल्हुइ
कादेखाम्बा सोइ
कादेदुइरि
तारेब्रा ताइला सम्बन्धजुगु सम्बन्धित ताला
वाङ्ला सप्तकोसि
खाराङ लासि ब्लुम्ला गोबरगाढा नाम्सा
ताल क्युइ छ्याबा ल्हुइ ।
तागाइ ! ख्लागो फकिर निबा तामजुगु
कुरुथुम आछेबा बलरामजुगुला रापजुगु
दुइ मुला दातेथामा
खिबारि आखाम ह्याल सेमजुगु
गिक्खे कोठारि दोपतासि
चिना लाउ दिम देन्बाला
ह्याङ ह्रेच्छाक किन्बारि खाम्ला ल्हुइला ताहुल
तिला भर कर्नालिला क्युइला
बिले निम्छरो ह्याङ्ला ल्हुइला ।
केवातेन दोतोबा मुला याफ्लारिन
ब्रातोबा मुला याफ्लारिन
म्हान्गो, फकिर
अपारदर्सिता सोसि
ह्युल बुल्कु स्होबारि ताला ?
छ्योल्सि स्वार्थरि धर्म रिमठिमजुगु
ह्रुप्सि काङ्फ्लाजुगु
सडकजुगु रनचे ताना लाबारि ताला ?
खाइ ! संबेदनसिलता ?
ह्याङ दोबा खानाङ ?
ल्हुइ जाजाकि गोबा हिन्साम
गोउ
बिले बेलुनला ह्रिक्पा
थिबारि खाम्ला याफ्लारि फ्याट्टा
थेह्राङ्बान हिन्ना ल्हुइ ।