डम्फु ह्राप्सि ब्राला ङा
पेङदोर्जे म्हेमेसे स्हेङबाला
ङाला डम्फुला काइरन कोसि ब्राला
ल्होछाररि डम्फु थेन टुङना ह्राप्सि स्याला
ङाला दिमला ख्राङगारि छार दाज्र्यु क्याला
हिन्ना ङा तामाङ हिन्ना
थे तासि ङाइ ङाला ह्युलठिम माइबा हिन्ना ।
ङा ग्यागर ह्युल्ला तासाइनोन
ङा तामाङ हिन्ना
ङा न्हाङरि तामाङला का छ्योङजिमुला
ङा यावेङ स्योङरि साइसि ब्याङबा
म्हेमेला सन्तान हिन्ना
थे भिमफेदिला हान्डोरि गाडि पुइसि
ब्रानाब्राना का रुइसि सिबा म्हेमेला
सन्तान हिन्ना
तिगा गल्ति मुबा ह्रिन्जेन दोर्जेला
थे रानिदहरि थोबो थासि हुर्बारि ?
दारेम ह्युलठिम थेन दोङरापला ङा
पानापाना ओरबाइगेन मुला
हिन्ना ङा तामाङ हिन्ना
थे तासि ङाइ ङाला दोङराप
माइबागेन मुला ।
तामाङदा सिबा स्या चाबा भोटे बिसि
हेप्दिबा तिल्दा ?
तामाङकादेसे लाहुरे दोमा गुरुङ
दोतोबा तिल्दा ?
दारेम कुटिसि आचि ङा
ङाला म्हेमेला काला
काकार लासि बदला किन्ना
ङा गर्व लासि पाङला
हिन्ना ङा तामाङ हिन्ना
ङाइ ङाला ताम्सालिङ माइबा हिन्ना ।
रौतहट, दात्ते याम्बु