१. ताङ्गि
ङान्ना दिमला क्वारार
सात्तान हाला ख्वारारा
च्यामा ओस्बान रा ह्राङ्बा
छ्योङ्ला हाउ पाङ्सि दाङ्मा ।
आपासे च्यागो ताङ्गि पाङ्ला
हाइमाम कोला छ्याम म्राङ्ला
ल्हुइ थेला ताला सिर्लिक्क
छ्योङ्ला मार्लाक मिर्लिक्क ।
गाङ होप बेनान ब्राला
ज्योइ च्यासाम राला
ङ्यासेन चिला रो ह्रिरि
ओन्छ्यान तिका तिला तिरि ।
चाला सात्तान पाङपिङ छे
हाइमाम छ्योङ्ला तिप्लिङ ते
चुङ्सि राह्राङ न्हाम्याङ्साम
ह्याङ्ला दिमरि बाम्याम्साम ।
२. सालि
च्यामा आरे ना देन लिः
पाल्देन हाउले च्यागे सालि
सार बो दिमा क्वारारा ताला
हाइमाम ख्राङ्गारिन हाला ।
आता थेला छ्यु नाख्रु
हाह्राङ लासि सुल ब्रामु ?
मोइला साप्रा दुलुलु
ब्राला साप्रा न्हाङरिन सुलुलु ।
ह्वाबा मामा था आछ्योइ
म्राङ्ना लासि सा आछ्योइ
ल्हुइ ताला ङेमङेम्बा
जात्तिन च्यासाइ आछेम्बा ।
काक्लाङकुक्लिङ ब्राला
हुर्ता हुर्ता छ्याम ताला
सालिले सत्तान मोइब्राला
साप्रा ताला दुल्बाला ।
३. ज्योप्पा साप्रा
ह्याङ मि हिन्ना जात्तुकु
ज्योप्पा साप्रा ह्राङ्बा
लोप्ला लाइदाङ क्रास्यासे
ह्याङ्से जे जे म्राङ्बा
लोप्गे सात्तान ह्याङ्से
ज्याबा जेबा चेक्खेन ताम
लोप्ला आदे ह्याङ्से
हाइमाइ आज्याम ताम
दोङराप ह्याङ्से स्होतोला
जाम्बुलिङरि ब्रा थान्सि
क्योङलान ङोन्साङ चादोला
आपा आमामा ना थान्सि
क्योङसेन पाङ्गाइ ज्याबा म्हि
हापाङ्गाइ हाल्सेइ आज्याबा म्हि
दोःदोला साक्लान ज्याबा म्हि
दोःला आदे ह्रान्दाला मि
च्यामा तिनि जात्तुकु
ह्याङ मि हादुइला म्हेन्दोकोम
ज्याबा ज्याबा ताम लोप्सि पाउ
म्होइजेन मुला कोन्ज्योसोम ।
४. स्वाला ताम
लाइले तिनि स्वा:ला ताम
ह्याङ, एला देन ङाला ताम
जेसुम हिन्ना स्वा: ह्याङ्ला
गोसि बोर्मा था याङ्ला
चासि जिन्सि स्ह्यो ङ्यासे
सात्तान म्याप्तोला स्वा: ह्याङ्से
चाला आदे ल्हामा केकेबा स्हे
केके चासाम स्वा: चाला बुलुङसे
चासाम स्वा बुलुङसे
ह्याङ्ला जेसुम तिका म्राङ्से
थुङ्ला आदे साङाला नाल
थेसे ताना लाला स्वा गाल
लादोला ख्रिपख्रिप स्वा: डिक्ना
तादोला कानाकुनि आस्हिक्ना
स्वा मि लिला म्हार म्हुइकोम
चुनोन ह्याङ्ला जेसुम ओम ।
५. ल्हाङ
ओ पाराङ ! च्यागो ल्हाङ
दात्तेम मुला पेडो थालाङ
मेःरि नाङ्मा ताला जो केर
तोमा दुर्ला सा बेरबेर
ओन्मा म्हेमे आखेसे
स्हेङ्जि तिका अक्किलसे
ङ्ह्यामा ताक्कालधुइ बिला
हाराङ लासि सुन फिस्ला
ख्राङ्गा दलान नाम्सारि
ङ्हाच्छाम तामुबा दिमदिमरि
दात्ते निजि च्याङ्सिमाम
हाउले लाइले ल्हाङला ताम
सुन तोमा म्ला दोला
हाइमाम नामनाम तोमुला
साङान स्योप्ला चु ल्हाङ्से
चापुङ्ला आदे म्हालाङसे ।
