ओ आलेआङा फुरफुर ताङ्सि खाउले लोप्खाङरि
ह्राङ्लान ग्योइ काइरि लोप्पाडोबा लाबारि ।
कादे म्हिला ग्योइरि आइतबार सोमबार बिसि ज्यासि ब्राजि
दारे ह्याङलान ग्योइरि दिनिरे लानिरे बिसि ज्यासि बोर्दोजि ।।
ओ आलेआङा ह्याङला ग्योइदा म्हिला ग्योइसे नाङ्सि थान्जि
ए ङा डिक्सि ह्याङ्ला ग्योइ ताम तोर थिसि बोर्दोजि ।
मङ्गलबार बुधबार बिसि आहिन ह्राङ्लान ग्योइरि मिरे न्हाब्याङरे बिसि पाङदोजि
ह्याङला ग्योइदा जम्बुलिङ क्योङनोन छार्न ल्हेना लादोजि ।।
ओ आलेआङा चु ह्युल्ला ठिमसे ह्याङदा खाइमाइ तोर निआपुङ्जि
दारे ह्याङनोइ छोर्गो रेगो लोप्खाङरि निसि लोप्पाडोबा लादोजि ।
चु ह्युल्ला ठिमतेन ह्याङलाइ याङताम म्हाइबारि सेबागोबा तादोजि
ह्याङसे दारे विहिबार शुक्रबार आहिन ह्युल्ला ठिमरि नारे सुङरे ब्रिबारि बाङ लादोजि ।।
ओ आलेआङा ह्याङ्से ज्याबाज्याबा ताम लोप्सि ङाच्छा ग्याम दाङ्गो
ह्याङला रिमठिम वंशला ताम आखे म्हेमेग्याम्से ङ्यान्थागो ।
दिमदिमरि ह्याङ्ला आमाग्योइ लोप्पा पाङ्बा लादोजि
शनिबार आहिन कामरे बिदोला बिसि मोक्कोन आलेआङादा लोप्दोजि ।।
घ्याङलेख गाउँपालिका वडा नम्बर ५ बुदुमचुली, सिन्धुली
