भुन्टे ह्राङला आमातेन कोर्बारि सिम्बुरि दोजि । भुन्टेसे चुबिमा ङ्हाच्छा थेमुबाकि चुरिमि माकार नोन माकार खाला, ओम माकारसे दुङाल पिन्ला । सिम्बुरिमि ला गौताम बुद्धला ङ्हाज्याङ कु (मुर्ति) मुला । भुन्टेदा माकार च्याबा सेम ताजि ।
सिम्बुरि दोजि । भुन्टे ताङसि ताङसि ह्राङला आमाला या चुङसि गेटन्हाङरि वाङजि । न्हाङरि वाङबाइतेन थेसे माकारकादे म्राङजि । तिलाइजा क्लाङसि टिबा, तिलाइजासे च्यासि टिमुबा । थे उदेक ताबान च्यासि टिजि । तिलाइ दुइ लिच्छा थेला आमादा ङ्योइजि, ‘आमा, माकारकादेमि खाराङबा चकचके ताबा टिम ?’ आमासे पाङजि, ‘हिन्बाम हिन्ना, बिसाइ थेनिकादेसे जुसि चाबा स्हेकादे चामुला । थेनिकादेसेमि, थेनिकादेला ह्रोकादे खालाइ ताइ नोन, दुङाल आपिन्बा मुला नि, थेनिकादे ल्हानान डिक्सि टिमुला ।’
भुन्टेसे पाङजि, ‘ए, हिन्ना वा, आमा ?’
आमासे पाङजि, ‘हिन्नामाले, भुन्टे ।’
थेसे दाबे माकारकादेदा च्याजि । खाप्पा खाप्पासे तिला लाबा टिम, च्याजि । आमा माकारसे ह्राङला कोलादा चेकाइसे कुरि चेप लाजि । भुन्टेसे तिला लाबा टिम बिसि, च्यासि टिजि । आमा माकारसे ह्राङतेन मुबा गिक्खे मोजे ज्योर तेजि । मोजेला फिमा ज्यानालासि फिसि ह्राङला कोलादा ख्वाजि ओम ह्राङसे नोन चाजि । ह्राङला कोलादा चेकाइ लासि दाबे कुरि चेप लाला ।
चु म्राङसि भुन्टेसे था याङजिकि ‘थेनिकादे चकचकेचे आहिन टिम । ह्राङला कोला ताइ नोन, चेकाइ लासि थान्बा टिम । डिक्सि टिबा टिम । क्लाङसि टिबा टिम ।’ भुन्टेसे ह्राङला आमादा फुर ताङबा पाङजि ।
‘आमा, ङाए नोन ज्ञानि तासि ह्रोकादेतेन डिक्सि टिला, क्लाङला ओम डोला । तिनि ङाइ जे म्राङजिनि, ङा न्हाङगार कक्षारि छाङमातन था पिन्ला ओम ह्याङसे नोन, माकारकादेग्यामसे नोन तिलाइ ज्याबा ताम लोप्तोला बिसि पाङला हाइ ?’
आमा फुर ताङबान, भुन्टेदा पुइसि चेकाइ लाजि ।
