याम्बु । ज्योति बिकास बैंकसे गोलबजार वडा नं. १० धर्मपुर, सिरहारि मुबा श्री आधारभुत लोप्खाङदा बैंकला सामाजिक उत्तरदायित्वला लाथि स्हेङ्बा ‘ह्याङ्ला बिकास प्रबद्र्धन कोस’ ग्याम २५ थान डेस्क बेन्चजुगु पिन्बा मुला । बैंकसे लोप्खाङरि डोबा लोप्खेनजुगुला लोप्बा वाताबरन ल्हेना थेन मुतेबा शैक्षिक अनुभबरि सुधार बाबा उद्देस्यला छ्याम थे ह्रो दोना लाबा हिन्ना ।
लोप्खाङरि स्हेङ्बा याखारगि गेताङ्रि ज्योति बिकास बैंकग्याम्से बैंकला गोलबजार शाखाला शाखा प्रबन्धक श्री भुवन धमलाग्याम गोलबजार नगरपालिकाला मेयर श्री श्यामकुमार श्रेष्ठ, गोलबजार वडा नं. १० ला वडाचोहो ओम लोप्खाङ डिपा गेन्दुनला चोहो श्री उपेन्द्र मुखियाला ओन्छाङ्रि लोप्खाङ्ला पधानाध्यापक श्री मधुराम महतोदा थे डेस्क बेन्चजुगु दोन्स्ह्युमुबा । गेताङ्रि बैंकला कर्मचारि, लोप्पोन, शिक्षा थुमला थेर्लान पदाधिकारि, ङ्हाच्छाला वडा चोहोजुगुला छ्याम लोप्खानला गेलाबा थेन लोप्खेनजुगुला पोप मुबा ।
दोन्बा गेताङ्रि ताम थान्बान गोलबजार नगरपालिकाला मेयर श्री श्यामकुमार श्रेष्ठसे शिक्षारि गुनस्तरिय पुर्वाधारला महत्वरि बाङ पिन्बान सकरात्मक थेन समृद्ध शैक्षिक वातावरन स्हेङ्बारि बैंकला ह्रो आउदिन ज्याबा ताबा थेन बैंकला सामाजिक उत्तरदायित्वला गेरि थुजुछे दोन्स्ह्युजि । छ्यामरि, लोप्खाङ्ला चोहो थेन प्रधानाध्यापकसे डेस्क बेन्चजुगुला डिपा ताबातेन कादे लोप्खेनजुगुदा सारिन चिसि डोतोबा बाध्यतादा जिन्बासे ह्रोला लागि बैंकफिरि सेमहेन्से ज्याबाफुल्जि ।
ह्राङ्ला मुनाफाग्याम नेपालरि दाते संचालनरि मुबा स्यान्दो बैंक थेन बित्तिय गेन्दुनजुगुसे सामाजिक उत्तरदायित्वग्याम्से सामाजिक गेरि लाबा योगदान बिमा ५० प्रतिसत ल्हाना न्होर फेसि सामाजिक उत्तरदायि दोबा चु बिकास बैंकसे ह्युल्बाला नोबा हित सातान फिला प्राथमिकतारि थान्बा मुला । गेन्दुनला सुसासनदा थोबोरि थान्सि ग्राहकबर्ग, कर्मचारि, नियामक निकाय, सेयरधनि थेन मुतेबा सरोकारवालाला हक हितरि योगदान दोना लाबारि ज्योति बिकास बैंक सातान प्रतिबद्ध ताचिमुला ।
ज्योति बिकास बैंकसे दाते १२१ शाखा गेदिम, गोरसोम बिस्तारित काउन्टर थेन ७५ वटा एटिएमग्याम्से बैंकिङ सेवा पिन्सिकेन खामुला ।