चुह्राङबा रे खागाइ
निबाजुगु क्रासिकेन खासि
एयरपोर्ट हेन्से नाम्सादोना लाम ल्हागाब तागाइ
फेबा मुतेबा ह्रोजुगु नाम्सारि स्पाप्गाइ
लाबा दुङाल म्लेगाइ, ताङबासे ब्लेहोप गाङ ह्याल तागाइ
फाबारे थेन झ्याउरेसे ब्ले होङगाइ
ह्राङलान ङ्हाउ डान्मा रुइबा खागाइ
ओम बिगाइ
माङग्यार ह्युलला बियरसे सुगर ल्हेजि
ह्रो ! जि थुङगे ।
सोबाम ह्याङ
ख्रेन्बा लोभि नाकिसे
चैतला दिनिरि साङबा म्हेला डि सिप्बा ह्राङ
सोजि कि सिजिन्जि ! ह्राङ लासि सोचिमुला
ह्याङ ह्राङबान
चुह्राङ चुह्राङ नोन लासि कोलेसे कोलेसे
ह्युल टाट दोगाइ
रेमिटेन्स थेन ह्युलला युद्ध तागाइ
भन्सारला संसाररि च्योलोङ तागाइ
राजस्वला पाइपजुगुरि खिप ल्हागतिगाइ, लाबा थोन्गाइ
कादे बाङ लासाइ नोन बाङ ल्हागाब आतागाइ
भ्रस्टचारिसे न्होर आस्याप्गाइ
ह्योसे ह्यो लाबा दुइरि रास्ट्रिय ह्वाइ जेक्खे ङ्ह्यागाइ
हाइरान तागाइ, दिक्क तागाइ
ओम बिगाइ
दारेम लेङबा एला का ङ्हाप्बारि जेक्खे हिन्ना
थेबिमा बरु जि थुङथे ह्रो ।
नियमसे काबारि आखाम्बा अकुतजुगुरि
छुत ल्हागाब तागाइ, देसान ल्हागाब तागाइ, डुडुइ ल्हागाब तागाइ
दाम्सि दाम्सि महलजुगुरि साङगुल निगाइ
माङग्यार ह्युलला आइराक खाबा जहाजजुगुरि
गान्दिरि सुनामि खागाइ
मुरि नामे तोइगाइ
ग्रेन होटल, डान्सबार, रेस्टुरा मुतेबादा
रक्स्याहा म्हाङ कोगाइ
थुङगे थुङगे म्हान्मा नोन न्होर आतागाइ
थुङगे थुङगे म्हान्मा नोन आइराक आतागाइ
ओम बिगाइ
माङग्यार ह्युलला आइराकसे न्होर जेक्खे जिन्जि
तागाइ, दारेम जि थुङगे ह्रो ।
खानाङ दोतोबा मुला ओम ह्याङदा ?
लानिरि दोसाइ नोन ताइबा जाम्बुलिङरिन हिन्ना
संसार डासाइ नोन तिरे सितोबान हिन्ना
न्होरला महलरि म्हेर्साइ नोन
एदाइ नोन लिच्छारि खालाइमि तोला
ङादाइ नोन लिच्छारि खालाइमि तोला
दुइदा टुना लाइ
खर्चदा जाकि च्याङना लाइ
ताङबा खर्च लासि थुङबा बिमा
ताङबा बो लासि जि थुङगे ह्रो ।