तिरेकुनु आपासे जाजाबा नाकिला कोला ह्राङला ह्रोला दिमग्यामसे बासि खाजि । बाबा रेकुनुन ङाइ थे नाकिला मिन ‘कुकु’ थान्जि । ‘कुकु’ खालाइतेन आलोङबा, बिबा ताम ङ्यान्बा ह्रिक्पाला मुबा ।
‘कुकु’ सात्तान आपा गेग्यामसे दिमरि खाबा दुइरि ल्हानान मे ह्योङसि ह्योङसि ताङबा लामुला । आपासे थेदा सात्तान स्या बासि पिन्मुला । ‘कुकु’ फुर ताङबान आपासे बासि पिन्बा स्या चाबा चुमुला । थेतासिन थेदा, दात्ते नोन स्या आबाते कान चाबारि आम्हाइमुला । ‘कुकु’से ङानि टिबा दिमदा रुङसि टिमुला । छ्यामरि ग्यामरिक्यार नाकिकादे चुबा म्राङजिबिसाम, थेए नोन चुला । चुसि ग्यामरिक्यारला नाकिकादे ह्यान्र्ना लाला ।
ङानिला दिमदा सात्तान रुङसि टिबा ‘कुकु’ तिलाइ लालिच्छा नाजि । आज्याना लासि नाजि । थेदा तिलाइ लाबारि सेम आतानि । तिलाइ चाबाइ नोन चाबा सेम आलानि । चु तामदा था तासिलिच्छा, ङानि छाङमान ल्हानान सुर्तारि ताजि । थे सुर्ता ताबारि नोन, ल्हाना सुर्ता ताबाचा, ङानिला आपा । सात्तान आपा दिमरि दोकाबा दुइरि ल्हानान ताङबा ‘कुकु’ तिनि नाबासे लामा ब्राबा थेन चुबारि आखाम्बासे लामा आपा ल्हानान सुर्तारि तामुबा ।
स्या म्राङमाइहेर्लाम, फुर ताङबा ‘कुकु’ नाबासे लामा कोबारि सुत्ताइ आखाम्मुबा । थेसे कान आचाबा बिसि, थेला कान सुरिदा पिन्मा थेदा ल्हानान जोक रेमुबा । बिनोन तोमा, थेसे ङ्हाच्छाबिमा च्याङनाचे कान चामुबा ।
दात्तेबिसाम, झन ‘कुकु’से तिलाइ नोन चाबा सेम आलानि । ङानि सुर्तारि ताबासे आपासे ‘कुकु’दा अस्पतालरि बोर्जि । डाक्टरसे बिबाअन्सार, ‘कुकु’दा फो स्हु खासि चुराङ तामुबा रो । थेचे आहिन्ना, ल्हाना चाबा चाबासे ब्लेक्खु थेन कान चाबा दुइरि वो वो खाबा रो । चु तामदा थेसि लिच्छा, ङानि छाङमान नेजि । ङानि नेबा म्राङसाइ आपाबिसाम, ल्हानान सुर्तारि मुबा । आपासे ‘कुकु’दा मान ख्वाजि । तिलाइ रेलिच्छा, ‘कुकु’ ङ्हाच्छाला ह्राङलासिन क्लाङबारि÷ब्राबारि खाम्जि । आपाला छ्यामछ्यामरि ङानि छाङमान ताङजि ।
ल्हानान ताङजि ।
