सिन्धुपाल्चोक । ह्योन्जनला सामुहिक फोला छ्योकु थेन ऐतिहासिक जोम्ना थुम्जि । लिसंखुपाखार गाउँपालिका–२ लिसंखु (ह्रिस्याङ्गो)रि मुबा छ्योइफेल कुन्देलिङ गोन्बोरि बैशाख ६ थेन ७ गते जोम्ना तामुबा ।
तामाङ ह्युल्बाला ह्योन्जन ह्रुइला फोला छ्योकु ठिमदा ओस्बान थान्बा थेन जाम्बुलिङला ह्योन्जनदा गिक्खे लाबा उद्देस्यसे ह्योन्जन वशं समाजसे जोम्ना ह्योन्जनला बाप्सा ह्रिस्याङ्गोरि थान्मुबा । थे गेताङरि नेपालला ४४ जोङ, ग्याकार ह्युल्ला सिक्किम, दार्जिलिङ, मिरिक, खार्साङ छ्याम ल्होलो ग्लाग्याम ग्यार्जा सोमसे म्हेन्दो च्युइ (३१०) प्रतिनिधि थेन स्थानियकादेसे बो किन्मुबा ।
गेताङला गिक्छाकुनु गोन्बोरि साङसेर्गेम, म्हार्मे मोलाम थेन माहांकालला छ्योबा लामुबा ।
६ गते योरि ७ बजेहेन्से छ्योआछ्यो ११ बजेदोना बिशेष सामुहिक फोला छ्योकु तामुबा । दिनिरि गोन्बोला लामाकादेसे लामा छ्याम (स्याबा) थेन स्थानिय कलाकारकादेसे ताम्बा व्हाइ गोबा, स्याबा लाजि ।
थेराङ्नोन लासि ल्होलो ल्होलो जोङ्ग्याम बो किन्बा ह्योन्जन स्रष्टा थेन कलाकारकादेसे नोन व्हाइ गोबा, व्हाइखा डोबा लाजि बिसाम ह्योन्जन वंशला सफ्टवेरला विकास थेन तथ्यांक विवरण भरब लाबारि प्रशिक्षण पिन्जि ।
७ गते वंशला मिनरि रोपनी ब्रे सा दान लाबा स्थानिय दाताकादेदा डेन लाजि बिसाम व्यवस्थापन लाबा स्थानिय थेन बोकिन्बा मोक्कोनदा प्रशंसापत्र पिन्सि गेताङ थुम्ना लाजि ।
ङ्हा दिङ ताङ्से चुराङबा गेताङ लासेला ह्योन्जन वशं समाजला चोहो महेन्द्रजंग तामाङसे ग्रा पिन्मुला ।
‘ह्रिस्याङगो घोषणा पत्र’
नाम्दुङला छेपा च्युइ (१०) थेन चुख्रिक (११), ह्रिस्याङ्गो
लिसंखुपाखर—२, सिन्धुपाल्चोक ।
लिसंखुपाखर गाउँपालिका वडा नं–२, ह्रिस्याङ्गोरि ह्योन्जन वंशला सामुहिक कूलपूजा तथा ऐतिहासिक भेला–२०८१ रि सहभागी तास्ह्युबा जाम्बुलिङलान ह्योन्जन थेत्माइकादेसे ह्राङला ओन्माहेन्से लासिखाबा ‘कूलपूजा परम्परा’ तिनि नाम्दुङला छेपा च्युइ (१०) (२०८१ बैशाख ६ गते) (तदनुसार २०२४ अप्रील १८) रि भव्यतालाछ्याम ‘सामुहिक रुपरि’ थुम्ना लाबा मुला । थेनोन दुइसाङरि ह्याङ ‘ह्योन्जनकादेला ऐतिहासिक भेला’ नोन बैशाख ७ गते थुम्ना लाबा मुला ।
चु नोन दुइसाङरि ह्युल थेन ह्युलफिर्केपग्याम फेप्काबा म्होकोन ह्योन्जन थेत्माइकादेला तर्फग्याम चुराङबा प्रतिबद्धता जाहेर लाबान चु ह्रिस्याङ्गो घोषणा पत्र जारी लाबा मुला ।
१) कूलपूजा परम्परादा यथावत् थान्बारि थेन एकरुपता पिन्बारि जरुरी ताबासे ङ्हादिङ एन दाङसि तिरेम सामुहिक रुपरि भेला ताबा थेन ‘कूलपूजा’ लाबा परम्परादा कायम थान्बा घोषणा लाबा मुला ।
२) ह्योन्जन समाजला वंशावलीदा पूरा लाबारि शफ्टवेरला विकास लाबासेलाबा ह्योन्जनकादे खान्दामान ग्लारि मुसाइ खाबा ङ्हा दिङ न्हाङरि म्होकोसेन ह्राङ–ह्राङला तथ्याङ्क (डाटा) भरबलासि थेन वंशावली ब्रिबा गेदा थुम्ना लाबारि ह्रो लाबा प्रतिबद्धता जाहेर लाबा मुला ।
३) ह्योन्जन समाजला ऐतिहासिक, धार्मिक, साँस्कृतिक महत्वला ग्ला, लेख, ताम्रपत्र, शनदपत्र, रुक्कापत्र, फाराप, दोङराप, केराप ह्राङबा दस्तावेजकादेदा म्हाइबा, अनुसन्धान, ह्रुप्पा एवं विश्लेषण लाबा थेन थेदा टुङ्गोरि दोना लाबारि म्होकोन ङ्हाच्छा वाङसि निबा प्रतिबद्धता जाहेर लाबा मुला ।
४) ह्रिस्याङ्गो ङामस्हुरला ग्ला ठुलोधादिङ, वाफललगायतला क्षेत्ररि मुबा, स्याप्पा ऐतिहासिक, धार्मिक, साँस्कृतिक महत्वला स्हेकादेदा संरक्षण, विकास थेन प्रवद्र्धनला लागिरि आवस्यक गेदा ङ्हाच्छा बोर्बारि आवश्यक म्होकोन खालला पहलकदमी लाबा प्रतिबद्धता जाहेर लाबा मुला ।
५) ह्रिस्याङ्गोरि मुबा पुरानो गोन्बोगाङ (लगभग १२ सय वर्ष पुरानो गुम्बा), ङ्हारदिम (रुवाङ्छु म्हेमेसे स्हेङबा युङबासाप्राला ङ्हाच्छाला दिम) म्हाङगाइ पाटी ह्राङबादा संरक्षण थेन विकास खाराङलासि लाबा बिबा थुमरि काठुइ लासि डिपिआर स्हेङबा थेन ह्रिस्याङ्गोदा गोर्गिक पर्यटकीय क्षेत्रला रुपरि विकास लाबारि पहल लाबा प्रतिबद्धता जाहेर लाबा मुला ।
६) चु म्होकोन गे लाबारि आर्थिक, भौतिक एवं बौद्धिक ज्ञानला आवस्यकता ताबासे थेला लागिरि ह्राङ–ह्राङला ग्लाग्याम ह्याङ म्होकोसेन पहल लाबा थेन आँटब लाबा गे पूरा लाबारि म्होकोन ङ्हाच्छा वाङसेला प्रतिबद्धता जाहेर लाबा मुला ।
७) ह्योन्जन वंशला विकासला लागिरि ह्योन्जन विकास कोष स्हेङबा अभियानदा तत्काल प्रारम्भ लाबा ।
लिच्छारि, कूल देवता लामाकोन्ज्यो महांकाल (गोम्पो छ्रयासी) से ह्याङ म्होकोदान ज्याबा लागाइ । ह्याङ चुनोन मोलाम लाला ।
जय ह्योन्जन वंश । जय महाँकाला । थुजेछे ।
नाम्दुङला छेपा चुख्रिक (२०८१ बैशाख ७ गते) (तदनुसार २०२४ अप्रील १९)
छ्योइफेल कुन्देलिङ गोन्पा, लिसंखुपाखर गा.पा.–२, सिन्धुपाल्चोक ।
