बागमति प्रदेश सरकारला प्रवक्ता थेन आन्तरिक मामिला ओम कानुन लोन्पो गंगानारायण श्रेष्ठसे बागमति प्रदशेरि पाङ्बा मुतेबा ग्योइला संरक्षण तासेला पाङ्जि ।
बिहिबार नेपाल तामाङ घेदुङ मरिण गाउँसमिति, सिन्धुलीला ङ्योइसाङरि मरिणरि ताबा सोमरेला तामाङ आमाग्योइ शिक्षक पुनर्ताजगि तालिमला ठ्वाङसेन लाबान लोन्पो श्रेष्ठसे तामाङ थेन बाइ (नेपाल) ग्योइ सरकारि कामकाजला गेरि बाइलामा ताङ्बा खाबा बिसि पाङ्जि । थेसे बागमति प्रदेश सरकारसे बैशाखला २४ गते याम्बुला बसन्तपुररि गिकखेजोम्ना लासि चु ग्योइ ङ्हिदा सरकारि कामकाजला ग्योइ तिसेला तयारि मुबा ग्रा पिन्जि ।
लोन्पो श्रेष्ठसे २४ गतेहेन्से बागमति प्रदेश सरकारला मुख्यमन्त्रि गेदिम छ्याम मुतेबा मातहातला गेदिमजुगुरि साइनबोर्ड, लेटर हेड नेपालि, तामाङ थेन बाइ (नेपाल) ग्योइरि ब्रिसेला जानकारि पिन्जि ।
लोन्पो श्रेष्ठसे बागमति प्रदेश सरकारसे प्रदेश सरकारि कामकाजला ग्योइ तिबा बैशाख २४ गतेकुनु उत्सवला लिरि तेन्बारि प्रदेशनाङ बिदा पिन्बा निर्नय लाबा नोन जानकारि पिन्जि ।