ङाइ तिनि गोर्गि बिजाराप पोपला छ्योइ डोबा अवसर याङजि ।
बिजाराप ब्रिखेन कार्तिकेय घिमिरेसे ब्रिबा बिजाराप पोपला मिन ‘बाल्बाला न्याय’ । चु छ्योइरि छ्योआछ्यो गोर डु बिजारापकादे पोप मुला । बिजारापकादे सरल ग्योइरि बिजामुबोकादेसे गोनागि बिजाराप ब्रिखेनसे ब्रिबाला मुला । बिजारापकादे आउदिन शिक्षामुलकला छ्यामछ्यामरि छाङमान बिजारापकादे ग्यामसे ह्याङसे ल्होलोल्होलो ताम लोप्पारि खाम्ला । बिजारापकादे चुराङबा मुला । ‘ह्रो’, ‘नानाला चेकाइ’, ‘छाङमालान का वाला’, ‘बाल्बाला न्याय’, ‘सेमला लाथान’ थेन ‘म्हेनिङ’ ।
बिजाराप ब्रिखेन कार्तिकेय घिमिरेसे बिजाबुमोकादेला देन्बा तिला थे थोरि चित्रन लाबान बिजाराप ब्रिमुला । बिजाराप ब्रिखेन कार्तिकेयसे बिजाबुमोकादेला सेम, दुङालथोरि बिजाराप ब्रिबा लामुला । दारेम ङा ‘बाल्बाला न्याय’ थोरि बिबाइकेन मुला । चु बिजारापपोपरि बिजाराप ब्रिखेनसे ल्हानान तामकादे थुइबा मुला । ह्रोला चेकाइ, नानाला चेकाइ, समाजरि मुबा विकृति, प्रजातन्त्रला ताम थेन ह्युलला कल्पना, ह्राङला दायित्व, खाराङलासि प्रिबा दाङतोला बिबाह्राङबा तामकादे चु ‘बाल्बाला न्याय’ बिजाराप पोपग्यामसे लोप्खाम्ला । बिजाराप ब्रिखेनसे चु बिजाराप पोपरि ल्हानान तामकादे थुइबा मुला । ङादामि ‘बाल्बाला न्याय’ बिजाराप पोप ल्हानान सेम निजि । छाङमान बिजारापकादे ग्यामसे ह्याङसे ल्हानान ग्यान किन्ताबारि खाम्ला । ङाइमि खाप्पाचा बिजाराप ल्हानान ज्यामुला बिसि निर्नय नोन लाबारि आखाम्नि । तिल्दाबिसाम, चु ‘बाल्बाला न्याय’ बिजाराप पोपन्हाङरि छाङमान समाजला विकृतिहेन्दे बिजाबुमोकादेला दायित्व, भावना, दृस्टिकोनह्राङबा स्हेकादेदा सरल ग्योइरि स्युबा मुला ।
‘बाल्बाला न्याय’रि ह्राङला आउदि डिक्पा ह्रोतेन छ्याम दुइ दाङबा रे थेन ह्रो फेबा दुइला दुङालला छ्यामरि छाङमान बिजाबुमोकादे न्हाङरि मुबा तामदा स्युबा मुला । ह्राङदा सातान चु लाउ, थे आलाउ बिसि कुल्बा नाना ब्रेल्बा लासि म्हिला दिमरि निबा छाङमान दिमला आले आङाकादेला थेह्राङला नानासे ख्लासि निबा तामदा बिजारापरि थुइबा मुला । चुला छ्यामछ्यामरिन बिजाबुमोकादेदा ह्राङला ल्हुइरि अभिभावक तोबा तामदाए नोन चु बिजाराप पोपरि याङखाम्ला ।
ह्याङला चु समाजरि ताबा विकृति, विसङगति थेन छुवाछुत छ्यामरि लेबाफेबादाए नोन ज्यानालासि चित्रन लाबा मुला । छाङमान जातजाति डिक्सिचे ह्युल्साला थोरि तिलाइ लाखाम्ला बिसि चु बिजाराप पोपरि बिमुला । बिजारापरि प्रजातन्त्रला ताम खामुला । ‘सत्य, न्याय थेन शान्ति ताबा ग्लारिचे, देन्बा प्रजातन्त्र ताला ।’बिसि बिजाराप ब्रिखेनसे प्रजातन्त्रला थोरि बिमुला । तिलाइ लासि तिलाइ स्हेला लोभरि वाङसि ह्राङला मानवता, कर्तव्य थेन दायित्वदा म्लेला आदे बिसि बिजाराप ब्रिखेनसे बिजारापरि प्रस्तुत लामुला । ह्याङसे ह्याङला प्रिबारि छार छार क्वान क्वान्बा, ज्याबा ज्याबा स्हे चाबा लासि ह्याङसे म्हेनिङ दाङबा लामुला । ह्राङबिमा ग्रेनकादे ग्यामसे मोलामए नोन ताबा लामुला । चु ह्याङला रिमठिम हिन्ना ।
ङादा चु बिजारापरि ल्हानान सेम निबा स्हेचा तिलाबिसाम, बिजाराप ब्रिखेनसे बिजाबुमोकादे आकोल्गाइ बिसि बिजारापन्हाङला छिगला अर्थइ नोन चुरि थान्बा मुला ।
लिच्छारि, ङादा ‘बाल्बाला न्याय’ बिजारापपोप ल्हानान सेम निजि । ङादा आशा मुला, आलेआङासे नोन चु छ्योइ डोला बिबा । बिजाराप ब्रिखेन कार्तिकेय घिमिरेदा ङाला ल्हानान ल्हानान थुजेछे मुला । छ्यामरि ओजा बिजाराप ब्रिखेनला ल्होलोल्होलो बिजारापकादे नोन डोम्याङबा सेम लाबान होक फेला ।
