क्युरेटिभ सर्भिस (उपचारात्मक सेवा) बिमा प्रिभेन्टिभ सर्भिस (रोकथाम लुलक सेवा) दा बाङ लाबा म्हिदा अफ्ठ्यारोकादे ल्हाना हाबा ताला । सेवा पिन्बाला ताङरि हाल्से हाराङबा रोल क्लाङसि चिबा मुला बिबा ताम म्हिकादेसे आगोदे दोना थेनिकादेला सेम बुजाब लाबारि आहाम । थे ताम थेनिकादेसे गोबा हिन्सेजा बिसाम सेवा पिन्बा थेन किन्बा ताङरि सजिलो ताबा ताला ।
म्हिकादेसे सेबा गोबा लाबारि सर्टिफिकेट जेक्खेन तोला बिबाला आरे । माइसि डोसि थेसि म्राङसिनोन ल्हानान ताम सेबा ताला । सेजि बिदेमा ह्राङला अथोरिटि बिमा फिला गे लाबारि आता । तसाइ थे बेनान नियमकादे बेनान म्हिसे पालना लाबा आस्याप । ह्युल्बाला माग थेन आर्थिक रुपसे बाङबा दोबाला लागिरि लाबारि आहाम्बा गेकादेनोन हालाइदा ङ्योइसि गुगलरि माइसि थे अन्सार गे लाजिबा स्याप्ला । विसेस लासि स्वास्थ्यला थुमरि चुराङबा अवस्था स्याप्ला । थेसे लामा नियमदा पालना लाबा म्हिकादे ओजेलरि ताबा अवस्थाकादे स्याप्ला । थेरि दोस थे नियम पालना आलाबाकादेला जेक्खेन आताना स्याप्सेला बिमा फिला सेवा माइबाकादेला हिन्ना ।
बिसेस लासि नाम्साला म्हिकादेरि चुराङबा कम्जोरिकादे स्याप्ला । थेमदेरिन नाम्साला जामेकोलाकादेला मानसिकतारि चुराङबा कम्जोर पक्षकादे स्याप्ला । गुनस्तरिय स्वास्थ्य सेवाला तामदा ख्लासि थेनिकादेसे ब्लाक्पा सेवा जेक्खेन माइबा स्याप्ला । तसाइ थेनिकादेदा ज्याना गोना लाबारि हाम्जि बिसाम हालाइ बिमा गोबा दोना लाबारि हाम्ला । दिम, नाम्सा थेन वातावरन स्वस्थ्य कि अस्वस्थ्य हाराङबा थान्गे बिबा ताम जामेकोलाला यारि ताला । जत्तुगु हिन्से खेप्पा खुयु दोना च्याबा गे जामेकोलासेन लाबा ताबासे नाम्साला स्वास्थ्यला स्थितिदा तोर थिबा गे जामेकोलाला यारि ताला ।
प्रविधिसे लासि पोसि हाबा दुइरि थे जामेकोलाकादेला छोरोवानोन जक्कि ल्हेसि हाबा मुला । प्रविधि, सिक्षा थेन स्वास्थ्यरि छोरोवा काप्पान हाबा मुला । तिल्मा हिन्ना बिबा ताम दत्ते आहिन बिबारि माइजि बिसाम तिल्मा आहिन बिबा ताम तिनि हिन्ना बिबारि माइबा मुला । स्वास्थ्यला थुमरि च्यामा ओदे ल्हाना छोरोवा आरेसाइ ङाच्छा थेन दत्तेला लेपलेप तुलना लातोमा च्याङना दुइरिनोन ल्हानान छोरोवा हाबा स्याप्पा मुला । चु छोरोवा दत्तेला छार छार पुस्तारि जेक्खेन आदाना ङाच्छाला माम खुयुकादेरिनोन हाबा स्याप्ला ।
ङाच्छा ङाच्छा कोला ल्हाना न्हासाइ गाङसाल सिना लाबाकादेलान दिमरि दत्ते गोर गि ङ्हि जेक्खेन न्हासाइ छोम्बो छार्ना लाबारि हाम्बा स्याप्पा मुला । फोरि कोला केबा दुइरि चेकअप लातोबा थेन चाबा स्हे डिक्तोला बिबा तामरि, संस्थागत डेलिभरि तादोला बिबा तामरि ल्हानान छोरोवा हासि जिन्बा स्याप्पा मुला । कोलादुगु न्हसि खोप पिन्तोला बिबा तामरि, सुत्केरिसे किन्तोबा आरामला तामरि, गोर गि कोला थेन आर्कु कोला गुङरि खेना लातोला बिबा तामरि ल्हानान छोरोवा हासि जिन्बा स्याप्पा मुला ।
थेराङ लासिन जत्तुगुदा बाप आइरक ख्वाबारि आदा बिबा तामरि थेन स्वास्थ्यरि असर लाबा स्हेकादेला बारेरि नोन ल्हानान छोरोवा हासि जिन्बा स्याप्पा मुला । तिल्मा बाप आइरक थेन अम्बल डुइबाकादेसे दत्ते ख्लासि हाबा स्याप्ला । ङाच्छा न्हाबा छाबा तामा ला डे दोना छावा न्हासि चिबाकादे दत्ते तिरेन छावा नाबारि आहाम्ना मानखाङरि मान माइबारि हाबा ताला । थेसे लामा रोगदा जटिल आदोना लाबारि ह्रो ताला ।
नाम्साला जामेकादेला छोरोवा न्होसि निबारि ह्रो ताबाग्याम स्वास्थ्यला लागिरि गे लाबा ल्होलो प्रोजेक्टकादे थेन दत्ते स्थानिय सरकारसे ब्लाक्ना लाबा सेवाला पहुच थेन काप्सिगेन बाबा स्वास्थ्य सेवाला सेन्टरकादे हिन्ना । थेला छ्यामछ्यामरि व्यक्तिगत फाइदा बिमा फिक्र्याप थोन्सि स्वास्थ्य सेवाला ताङरि पिन्बा प्रिभेन्टिभ सर्भिसला कारन नोन हिन्ना ।
चुराङबा स्वास्थ्य सेवा स्वास्थ्य शिक्षा थेन परामर्स पिन्मा थेनिकादेला सेमरि वाङसि ङामथेमाला म्हिला रुपरि किन्न लासि थेनिकादेसे गोबा ग्योइरि पाङबा हिन्से आगोबा तिगाइ आदा । बेनान सेवाकादे आगोदे दोना पोजिटिभ रुपरि आकिन्बा जामेकोलाकादेसे स्वास्थ्य सिक्षा थेन परापर्स गाइना दोना स्याप्पा हिन्से गोबारि हाम्जि । थेसे लामा जाचाबा समस्या नोन ग्रेन दोसि अकालरि ल्हुइ ब्याङतोबा अवस्था च्याङसिन निबा स्याप्ला ।
नाम्साला जामेकोलाकादेला स्वास्थ्य छोरोवा ल्हानान तासि हासाइनोन योना योना छ्योङबा प्रविधिला ङोन्छाङ जक्कि छ्योङबा आछ्योजि । दुइ अन्सार छोरोवाला गुनस्तर छ्योबारि आहाम्जि । थेला लागिरि जामेकोलासे तिगाइ अवसरकादे दाङतोबा म्राङबा मुला थेन ह्राङ ह्राङला नाम्सारि स्वास्थ्यकर्मिकादे थोन्ना लातोबा म्राङबा मुला । छ्यामरि दिमला जाकोलाकादेला समर्थन नोन आवस्यकता ताबा म्राङबा मुला ।
पनौति, काभ्रे
जुम प्रविधिग्याम ग्योइकाइ गेताङ यसमा जुम फोटो ४ वटालाइ मोर्च गरेर राख्नु होला
याम्बु, तामाङ डाजाङसे जुम प्रविधिला माध्यमग्याम ग्योइकाइ गेताङ स्हेङबा मुला । ला दाङसेला लिच्छाला काम्रे कुनु नियमित ग्योइकाइ गेताङ याम्बुला आर.आर क्याम्पसरि लाबान खाबा डाजाङसे कोरोना भाइरस ह्यामला कारन लकडाउन तामा काबा गेताङदा अनलाइनला माध्यमग्याम स्याङबा हिन्ना ।
लकडाउनरि दिमग्याम थोन्ना आम्याङसाइ दिमरि मुबा तामाङ स्रस्टाकादेदा कोरोनाथोला ह्वाइखा ब्रिबारि प्रोत्साहन लाबान डाजाङला फेसबुक पेजरि ह्वाइखा, गजल छ्यामला रचनाकादे छिबान खाबा डाजाङसे ब्याल्बोला गिक्छा काम्रे ७ गते ग्ला–ग्लारि मुबा ब्रिखेनकादेदा प्रविधिला माध्यमग्याम थुइबा हिन्ना ।
मनिकलाल घिसिङ, खोजराज गोले, भिम दोङ, राजु ब्लोन, ङेमा गोले, सजना गोले, स्वयम्बर लामा, अर्पन उत्कर्ष, सन्चु ब्लोन, बुद्ध योन्जन, रचना मोक्तान थेन प्रयत्न वाइवासे बो किन्बा मुबा ।
चु ङाच्छा लकडाउनला दुइरि नियमित गेताङ आतासाइ ल्होलोल्होलो स्रस्टाकादेला च्युइसोमसे गोर ङि (३२ वटा) ह्वाइखा, गजल, ह्वाइ डाजाङला फेसबुक वालरि छिबाला मुला ।
