चुपाल्से एन्ला कुरि म्हेरम्याङजि । बैशाखला छेप्पा नाआखाम्ना छेप्पासे क्रोसि म्लाङम्लाङ दोजिन्बाला ङाला लिरि साइलुङला सिम्बा लाबा थेन ठाक ठाक्पा क्युइसे फात्छोर्जि ।
एला कुरि दोबारि डेन्साङ फुल्मुबा साइलुङ जोम्ना ०७६ से । चुपाल्से दोरम्बा, साइलुङ थेन मेलुङसे स्योङखर्करि जोम्ना स्हेङबा हिन्ना । थेतासिन ङाएन रुप ताजि । एनोन साइलुङ थेमेतेन । तोर तोर साइलुङ । चाउरि गोठे । छुर्पि थेन मुडेला तेमेसे क्योङलान सेमछुना लाबाला मुला । खानाङ दाम्मालान म्हिसे एलान मिन जिमुला । ङाइ एदा बिनोन तोला । साइलुङ एदा डान्सि चिमुला । म्हान्सि चिमुला । साङगोन स्ह्यापला कुरि चिबाला साइलुङ । वाफ्युर थेन तारलेम पाडा म्हेन्दो चाङछारह्राङ लासि जेबा एदा क्योङसेन बिला एदा– ‘आहा साइलुङ !’
चैत बैसाखाला खडेरिरि सुताइ पिङगाइ न्हाङला जेसुम एदा च्याबारि जाम्ुलिङखोरला म्हि पोप ताला । क्योङसेन एदा बिला– आहा साइलुङ । ओहो साइलुङ । ओदे ल्हाना म्हिकादेला माया याङसि ए आझाइ नोन नोसि चितोला । तामाङ ह्युल्बाला गुङरि नोसि चिबा साइलुङ एमि क्योङलान डिहिला म्हेन्दो दोसि चिखाम्गाइ । एला कुरि मुबा च्यान उ म्राङसि क्योङसेन बिला वा ! साइलुङ । साङगेला स्ह्याप थेन महादेव डान्सि बिनोन तोला । तोरतोर साइलुङ कोर्मामि । ङानि डिक्सि ब्रामामि । मायाला ह्युल । साङगे कोर्बा ह्रि । पाडाम्हेन्दो सार्बा ग्ला । एदा बिनोन तोला । मायाल ह्युल । तिङ न्हाङला सेमरि थान्ला एदा । क्योङसेन चुह्राङ नोन बिला । चुह्राङबान पाङला । लानि दिनि ह्राङबा फेसि चिबाला एला माया क्योङदान थोप्गाइ । चुपाल्से खोलाखर्क रामेछापलासे याङजि । खाबा दुइरि दोलखासे याङला । आहा एदा माया लासि मेलुङ साइलुङ थेन दोरम्बासे दिङदाङसेन जोम्ना स्हेङला तोरतोर ल्हारि चाउरि मुइ थेन ग्यु गोठेसे म्युर्गाइ । ङान्से बिबा चोतेन । म्हान्बाएन चोतेन ।
साइलुङ गाङ
ल्हारि चिबा लादा फ्याफुल्ला । ह्रिरि चिबा लादा फ्याफुल्ला । ओम माने पेमे हुङरे । बिबान पाडाला म्हेन्दो सार्बाला वाफ्युर गाङकादेरि ङानि कोर्बान खाला । जाम्बुलिङ खोरला म्हिकादे साइलुङ एला कुरिन पोप्ला । क्योङ नोन पोप ताला । तासाइ चिबा ग्ला आरे । चाबा स्हे आरे । सिम्बा लाबा मि लासेन दोन्बा स्हे हिन्ना । ग्लिङ थेन क्युइमि लासेन स्होबा स्हे हिन्ना । साइलुङ एसे पर्यटन छार्ना ल्हेना लाबारि म्हाइबा मुला । एसे थारेङ थारेङग्याम खाबा डोन्बोजुगुदा डेन लाबारि खाम्तोला । तिरेम आहिन दिङ दिङ दोना खाबारि म्होइजेन लातोला । ङान्सेमि बिबा जेक्खे हिन्ना । लाबामि एसेन हिन्ना । लाबामि ए ह्राङसेन हिन्ना ।
एला कुरिन मुला दोरम्बा । दाते सरकारसे बाबा ह्राङबा युद्ध पर्यटनमार्ग थेरिन मुला । तामाङ सहिदकादेसे ब्योङबा काला वाला का साप्पा साप्रा । थेरिन मुला । एसे थेदान डान्सि म्हान्सि साइलुङ पर्यटन थेन दोङबारि खाम्ला । कुन्ति नानासे बिबाह्राङ ‘माथि माथि सैलुङगेमा चौरी चराउनेलाई…।’
साइलुङ । चाउरि । छुर्पि । ओसेम नोबा गाङ । सिम्बा क्युइ । पर्यटनसे पाथिभारा म्युर्सि जिन्जि । ताप्लेजोङ हराभरा ताजिन्जि । हलेसि उ च्याबारि पर्यटक तोङजा तोङजा निमुला । हलेसिसे लासिमाम खोटेहाङ फ्युक्पो दोजिन्जि ।
सोमाया पोखरिरि ख्रि लाबारि निबासे लासि सङखुवासभा थेन मनकामनाकादे ङ्हाच्छा ताजिन्जि । धरान, चतराधाम, माइपोखरि, चियाबगान, भेडेटार, कन्याम ओस्सोन पर्यटकिय धाम दोजिन्जि । साइलुङ एला कुरि साङगुलसे फुप्बाला घ्याङ, काकलिङ, गुम्बाकादे ओस्सोन क्राचिबाला मुला । महादेवला लाथानकादे अझाइ स्होबारि खाम्बा आरे । एन्से बाङ लोनोन तोला । एन्से स्होनोन तोला । जाजाकि दोतोला ।
सेमसे म्हान्सि डान्सि जेक्खेन आताबा चिम । कमानसिङ लामा, देवि खडका, पार्वत गुरुङ, स्यामकुमार श्रेस्ठ ह्राङबा गोबोनकादे एन्लान कुरि छार्बा मुला । सांसद हेन्से मन्त्रिदोना दोजिन्जि । थेन्से ह्राङदा ह्राङसेन ग्रेन दोना लाबा आहिन । साइलुङ एसे मोलम पिन्सिन हिन्ना । एलान मोलमसे । एलान ज्याबाम्हान्बासे । एसेन ग्यालाम उन्बासे । एसेन ज्याबा तागाइ बिबासे । खालाइसे एदा कासि आखाम । खालाइसे आज्याबा बिआखाम । तामाङ नाम्साबाकादे बिकास आताबा ओस्सोन आहिन । साइलुङ एसे चुग्लाला तामाङदा छोर्ना लातोला । गोना लातोला । सोना लातोला ।
प्राकृतिक पाडाला म्हेन्दोला जुस स्होसि मानला रुपरि चुङबारि खाम्ला । जाजुबाहेन्से खेप्पा खेप्पा फिलिम सुटिङ लाबारि खाम्ला । चाबा थुङबा थेन चिबा ग्ला स्होतोजि । पर्यटक ओस्सोन आखा । पुर्वधार स्हेङनोन तोला । साइलुङ ह्रिरि याङबा यार्सागुम्बा, पदमचाल, पाचऔले, जटामसि ह्राङबा मानकादे ह्रुप्सि चुङबारि खाम्तोला । एसे भ्युटावर स्होसि च्यासि जेक्खे आता । भ्युटावरग्याम कन्यामला गाङह्राङबा ग्यार्जालुङ एसे पर्यटकदा स्याउस्याउ झिल्के बिबान स्याना लाबारि खाम्तोला । म्रावाइ जोडिह्राङ कोर्बारि खाबाला जोडिकादे थेन्से म्रावाह्राङ वातावरन स्होसि स्याना लाबारि खाम्तोला । चुदे तासाम खाबा दिङरि ताबा साइलुङ महोत्सवदा वाउ बिबारि खाम्ला ।
चुपाल्से निबारि आखाम्बाकादेदा दोबारि आम्याङबाकादेदा दोसिन म्हेइजेन लासि पोप्पारि खाम्तोला । ओस्सो तासाम तिरे आहिन । साइलुङ स्हिबारि कोर्बारि सेर्खा बार्खा पर्यटककादे स्याउरिह्राङ ताति दोसि कोर्बारि निला । फिर्सि फिर्सि साइलुङ कोर्ला । साइलुङ डाङ छुर्पि थोसि बोर्ला ।
ह्राङ ह्राङला दिमरि ।
म्हिसे म्हिदा लाम थासि ब्राबा चु दुइरि बिनोन तोला साइलुङ क्योङलान म्हारम्हुइ हिन्ना । जाम्बुलिङला जेसुम हिन्ना । जाम्बुलिङ खोरला म्हिजुगुसे तिरेम कोर्नोन तोबा गोर गि ने ताबारि खाम्ला । चु नेदा क्योङसेन तिराम ज्याल्तोला ।
ज्यारुङ खास्योर थेन फापा सिम्भु कोर्सि जिन्सि नाङबा साङगे केबा चु ह्युल्दा जाम्बुलिङ खोरला पर्यटकसे साइलुङला क्युइ बुम्बारि ख्योसि बोर्बा स्होबारि खाम्तोला । ह्याङसे ह्याङला ह्युल तोर थिना लाबारि तिलाइ लाआतो । प्रकृतिक साउन्दर्यसे पिन्बा जेसुमदा ज्याना लासि प्रयोग लाबारि जेक्खेन खाम्तोला । थोबो जुसि खाज्युबाइ ह्युलरि प्राङना दोसि राप आतो । ह्राङला काङरि ह्राङ नोन राप्बारि खाम्ला । साइलुङला ग्लिङ हेन्से पाडाम्हेन्दो दोना विस्व बजाररि चुङबारि खाम्तोला । ओसेम क्योङसेन बिला– आहा साइलुङ । आहा साइलुङ ।
