चुपाल्से पत्रकारला गेन्दुनसे लाबा गेताङरि बोकिन्बारि पोखरा दोम्याङजि । आहा ! फेवाताल । कादे जेबा फेवाताल । पोखरा दोसि चु ताल आकोर्ना खालाइ आदोबा चिम ।
व्हाइ ब्रिबासे ह्वाइ ब्रिजिम । ह्वाइ कोबासे ह्वाइ कोजिम । फेवातालरि साइलि । फेवातालरि माछापुच्छ्रेला छाया । ओराङबान ओराङबान । चु ताल फिरि ल्हानानसे ग्योइकाइरि छिगकादे स्युसि जिन्मुला ।
ग्योइ थेन क्युइ ओराङबान थेन ओस्सोन फ्युबा आहिन ताला । क्युइ छ्यासि क्युइला ग्योइ ताबा चिम । क्युइ छासिमामि स्याबाल (लेउ) छ्याबा जिम । स्याबाल थेन क्युइला ताम लासि म्हिसे पाङबा ग्योइरि ग्योइकाइ छार्बा चिम । क्युइ गोर्कि सिर्जनाला म्रु हिन्ला । स्योङ म्राङसिमामि ब्रिगुसे काइ सेङमुला । क्युइला काइसे बिमुला छङछङ ङ्ह्याबा छहरा । छहराले फोला पहरा ।
चु सेमरिएन फेवाताल म्राङसि सेम ताङजि । सेमसे म्हान्जि । सेमसे डान्जि । डान्ना डान्नान सेमरि ग्योइकाइला पुबुम्हेन्दो म्रुजि । फुइजि फेवातालरि कमल म्हेन्दो सार्बाह्राङ । सेमला डिहिला म्हेन्दोसे म्हि ह्युलदा थाङ ठाम्जि । चु सेमसे चुराङबान म्हान्जि ।
क्युइरि तार्ङा क्याल्बाह्राङ । सेमला ग्योइरि ताम क्याल्जि । फेवातालरि माछापुच्छ्रे ह्राङलासि ।
जाम्बुलिङखोरला म्हि ल्हुइला ताममि तिगा लासे । कोर्ना कोर्नानान । ब्राना ब्रानान । चाना चानान । ग्योइकाइ सेमसे म्रु ठ्वाङबाचिम ।
ब्रिगुसे ओस्सोन ब्रिबा आहिन । सेमसे म्हान्दोजि । डान्दोजि । सेमसे छुना लातोजि । ओसेमका ब्रिला । ओसेमका छिपाला ताम खाला ।
आइराकसे ङ्ह्योइबा म्हिसे देउसि क्लाङबा ह्राङलासि खालसे ब्रिला । तिला ब्रिला । सेमरि पाडाम्हेन्दो सार्बाह्राङ ताजिम । एदा ह्रुप तामामि स्योम्हेन्दो सार्बाचिम । सार्जिम । फार्जिम । सेम ताङजि । फुरफुर ताजि । स्याजि म्राबाइ जोडि स्याबाह्राङ ।
सिद्दिचरनदा छोरजि । मेरो प्यारो ओखलढुंगा । प्रमोद खरेलदा छोर्जि म बिना कसैकसैलाइ मुस्किल छ पोखरामा । खालाइसे व्हाइ ब्रिजि । खालाइसे व्हाइखा ब्रिजि ।
क्योङसेन सेमला तामदा कोइताम सेङजि । स्युगुरि छिसाइ । युङबारि छिसाइ क्योङसेन थेनोन लाजि । लामाला अक्षर युङबारि । खाइमाइ आन्होङनि । खाइमाइ आफ्याङनि । तालनोन तालला सहरिकरन पोखरि थेन पोखरा । ङाला तिङमाइ पोखरा । फेवाताल रारा ताल । बेगनास ताल । माइदिङ ताल । आहा ! सराङकोट । सेम फ्याङजि लाबाह्राङ फुरुरु । प्याराग्लाइडिङ ह्राङलासि । म्हिनोन फ्याङजि मुक्पाह्राङ । मुरि कावातेन काकाकुल ह्राङलासि । सारि ग्योइ । मुरि कावा ।
आहा ! तालबाराहि एदाएन डान्सि चिमुला । तालरि क्याल्बान क्याल्बान दोबा एला कुरि । आहा ! कादे सेम ताङबा होइ । सेमिफाइनल खेलाडि ताङबाह्राङ । हिन्बामि ब्राबाकादे ङ्हाच्छा दोबारि खाम्जि ।
तामाङला ग्योइकाइसे ग्याम थोर्बा ह्राङ छोर्बा मुला । म्हाइसि म्हाइसि ब्रिबारि खाम्बा आरे । कोर्सि कोरसि ग्योइकाइ फिरि काठुइ लाबारि खाम्बाआरे ।
ह्याङसे म्हाइबा ग्याम तिगा हिन्ला । गोतोबा दुइ खाजिन्जि ।
सन्तबिर म्हेमेला ताम लासाइ । जङगबिरला ताम लासाइ । ताम्बाकाइतेन बिसाइ । जिकतेन तामछ्योइ बिसाइ । खालाइसे खालाइला मतलब आरे । अमृत योन्जनला ताम लासाइ । तामाङ डाजाङला ताम लासाइ । स्रस्टा समाजला ताम लासाइ । क्योङलान दोखाङ गिनोन चिम । आमाग्योइदा छार्ना ल्हेना लाबा । म्हागे लाबाला आमाग्योइरिन ल्हेङमो लाबा गेताङ चुजि । आमाग्योइरिन ब्रिबारि । म्हाइजि । ताम पाङबा सिपालु म्हि म्हाबान निजि । ज्यार्दिरि पाङबा ल्हेबान मुला । ह्राङला जा ख्लाजिम ।
पारिजात नानादा डान्जिमुला । गोपाल योन्जनदा डान्जिमुला । सन्तबिर म्हेमेदा डान्जिमुला । ह्याङ पेङदोर्जेला सन्तान । डम्फुला काइरान म्हान्मुला । डाम्फु च्यामा च्युल च्युल म्राङमुला । तासाइ ह्राप्सिमामि काइ तेबाजा आम्राङनि ।
हिन्बामि चु ह्युलरि गोङमा तिबा तिल्मा जेकेन छोर्मुला । दुइ ल्हानान ङ्हाच्छा निजिन्जिम । सेमन्हाङ्ररि डान्बाला चोमलुङमा रेजिन्जिम । जाजाकि ल्हुइला ग्यालाम तिबारि म्हाइबा जेकेन मुबा चिम । ङ्हाच्छा तिबारिजा खाम्बा आरे बिसाइ ताला । तिनि फेवाताल कोरजि । सेम ताङजि । न्हाङगार लुम्बिनि कोर्ला सेम ताङला । न्हाङगार सिम्बु कोर्ला । सेम ताङला । चु ल्हुइरि कोर्बारि ल्हानान ग्ला लेङबा मुला । दार्सेला दुइरि झार्युङ्खास्योर कोर्ला । ज्याबान ताला । सेम ताङला ।
ब्रारि मुसाइ ह्रिरि तासाइ ब्राबाकादे दोखाङरि दोजि । दोखाङ डुप्जि । म्हेर्बाजुगु म्हेर्सिचिजि । म्हेर्बाजुगुसे म्हाङ जेकेन म्राङजि । म्हाङ ओन्छाङरि खाइमाइ आफेनि । डान्जि । म्हान्जि । तामाङ ह्युल्बासे ह्राङला ग्योइकाइरि लाबारि ल्हानान लेङबा मुबा चिम । कोर्ना कोर्नान ङाइ गोबा ओसेम डान्बा चुदेन हिन्ना । खालाइसे तिगाइ लाबारि म्हाइसि जेकेन आताबा चिम । लाबासे लासाइ काङ छेङबासे खाइमाइ थेला पुरान बानि आख्लानि । आमाग्योइसे तिगा बिला । आमाग्योइरि तिगा लातोला । क्योङदान थाहा मुला । बिनोन तोला ।
प्रस्ताब लाबारि खाम्ला ह्याङ तिग्दा तोर खाबारि खाम्ला । प्रेसला तस्बिर कादेज्याबा म्राङजि । तामाङला ह्युल्बारि दोङराप च्याबारि डोबारि खाम्तोबा चुनाउति मुला । बिनोन तोला राज्यसे च्याबामि दान्देदोना ओदेज्याबा आतानि बिसाइ ताला ।
ग्लेठिमसे तामाङदा निच्छा दर्जाला ह्युल्बा ह्राङले च्याबाला मुला । ग्योइ ग्योइकाइ, दोङराप, कला थेन रिमठिमदा छार्ना ल्हेना लाबारि तिगाइ लाबा आम्राङबा अवस्था मुला । कोर्सि ब्रह्मान्ड म्राङबा चिम । सेमसे म्हान्बा चिम । ह्राङला ह्युल्बादा डान्बा चिम । स्यान्दो ह्युल्बाला दोङराप तेन्बादा प्रज्ञा प्रतिस्ठान मुला । सस्कृति मन्त्रालय मुला । ह्याङलामि खाइ तिगाइ आरेम । ह्युल्बासेन लातोबा । तेन्तोबा । रेन्तोबा । ह्युलासेन क्रिङतोबा । बोल्तोबा । आहिन चुराङ लातोबा तिगदा ।
लेवाफेवादा ह्याङसे खाइमा गोला ? ह्युल्बासे चुदा ज्याना लासि म्राङबा मुला । क्योङनोन ह्युल्बाला रिमठिमला दोङबो थेनोन ह्युल्बाला ख्राङरि मुबा चिम । तासाइ थे ह्युल्बासे जेकेन तेन्बारि खाम्बा आरे । तासाइ खाम्दे दोना बाङजा लातोमुला । ह्युल ह्युङबारि क्युइ थेन रिमठिम क्योङदान तिङ बिमा ग्रेन तामुला । थे गोतोला । ह्याङसे च्यातोला । गोतोला ।
पोखरा कोर्सि च्यामामि लुम्लेला मिन म्लेबा आता । लुम्लेला सिम्बा । क्युइ थेन ग्लिङ ह्राङबा । सराङकोट आदोना तिग्दा दोसे । तिङरि छेक्पा थे लुम्लेला लाबादाएन थुजेछे ।
