दिम दिम ग्यम्से म्हिकादे थोन्जि । थोन्दे म्हिला ल्हि ङ्यहाला लानि राङ्बा याल याल्बा मुबा । नोबा नोबा ल्हारि निसि छोसि चाबा, स्याबा कोबा लबारि निलाबा लस्करकादे हान्डो हान्डो ख्रेजिबा मुबा । ओहो १ तिनिम विक्रम संवत् २०८१ ला छार दिङ । छार दिङरिम छारछार ग्ला कोर्बा, चाइ मान्बा चाबा , लाई मान्बा लाबा, तिलादाम्मा तासाइ तिगाइ आहिन तिगाइ लाबा ठिम ल्हेसि निजिबा मुला ।
हेर लासि नाम्सा ट्वालला म्हिकादे गालग्याम दाम्बालिङ थोन्बाह्राङ ब्योटोटो थोन्मा ङादाइ थोन्सि नि मान्जि । सातान निबा ग्लारिम तिग निसे बिसि क्याम्साङ्ला चोङ नोबा ज्योति पुखु गाङरि नि मान्जि । थेरि हत्तेदोना अनिजिबा मुबा । दिन्सेला कान खु चासि याक्खर गि जोला गि लाप फेर्सि थोन्जि। म्हिकदेला ल्हिरि मुबा राङ्बा चमक मुरि फेजिबा दिनिरि अरेबा मुबा । बैशाख ला तसाइ दिनि चौकास अरेबा मुबा ।
माने गाङ, सेबाङ, छार म्राङ ताबान रुलुलु निजि । निना निनान याम्वु ग्याम ख्लि च्याम थोसि ब्योङ्जिबा वाग्मतीला कुरि दोजि । लुङदारला मन्त्र लुङ्से खेजिबा मुबा । थेरि म्हिकदे ह्रापरुप तासि जात्रा छुना लजिबा जिम । क्यामसाङ्पट्टि याम्बु जोङ्ला सिमपानि चम्बु नाम्सा , जासम ललितपुर जोङ गुङरि मुबा एकोहोरो ब्योङ्चिबा वाग्मती स्योङ । चुदा कटुवाल ग्योइ मिन्से ङोसेबा मुला । तिनि बैशाख गि गते जात्रा मेला ताबा ग्ला । चु ग्ला ला सांस्कृतिक, ऐतिहासिक, पुरातात्त्विक ओम धार्मिक महत्त्व ल्हानान मुला ।
कटुवाल ग्योइ थेन सङ्कटाला बाह्र बर्षे मेला , कटुवाल दह थेन मछिन्द्रनाथला जात्रा , कटुवाल दह थेन वाग्मती तिर्थ ल्हाम ला सम्बन्धला राप थुइबा मुला । ङाइ तिनि थे रापपट्टि अबोर्ना । तिनिला जात्रारि म्राङ्बा ताम ओम तिनि ङाइ कोर्बा ताम जे पाङ्ला ।
थाङ्सिङ दोङकादेला गुङरि क्यार पाङ्ग्याल मुबा । थे पाङ्ग्यालरि युङ्बाला बो बो मुबा । ओसो च्यामा न ला वा बिबा राङ्बा । तिगदा बिसाम लाथान ङामरि मुबा स्हेकादे ला राङ्नोन मान्बा मुला । सहकालला ला, याम्बु पोगोलरि रेङ्बा जात्रा तबा ला मछिन्द्रनाथला देवलनोन ता रप्सि जात्रारि दोगापा म्हिकादेदा वरदान पिन्जिबा मुबा । म्हिकादे फ्या लाजिबा मुबा । ङाम स्योङ वाइसि क्याम्साङ निदोबा म्हि, म्हिकादे थेन लथानला लाकादे च्याना च्यानन हिरिन कोल्जि । गोर ङि सोम ङेङ्गोर नोन रुप ताजि । खालाइ स्यजिबा, खालाइ चाजिबा, खालाइ छोङ लजिबा, ओहो, कटुवाल ग्योइला जात्रा आउदिन छुजिबा मुबा । ल्हाना राङ्बा बाइकादे हाबाजिम । ङाइ थेबा आन्सार थे ग्योइरि नुवाइदिसाम ल्हुइरि हाबा क्याब ह्याम फान्बा रो, तासाइ हिरि हालाई नुवाइदिबा क्याल्बा आम्राङ्नि । नुवाइ नोन हछ्यप्से दिसे । पवित्र वाग्मतीरि ख्लि च्याम बन्दा तिगाइ आरे । नुवाइदिसम ओीोि लिसो जा म्हि नाला तला ।
क्यामसाङ नितोबा जचुबा म्हि ब्राबा झोलुङ्गे पुलरि म्हिकादे खाबा निबा लाजिबा मुबा । ङादा थे ग्याम बाइक थोसि निबा बाङ आहानि । तिगदा बिसाम म्हि ब्राजिबा ग्लारि तिगदा डिस्ट्रब लासे बिबा राङ मान्सि घुमाउरो ग्यालम ग्याम नि बिसि थोन्जि । क्याथाङ निसि क्यारिम क्लाङ्जिबा ब्योनकदेदा ङ्योइबाम फर्सिडोल दोसि निमाम झन गाइला । बडु मर्से सेबाङ दिला युङ्बा खानिला क्रसर ग्याम निउ रो । हिन्ना मान्सि फ्लिक दोसि हाजि । दोसि मात्थाङ हासि ङा ज्योति पुखु गाङरि नि बिसि हाबा । म्हिकदेसेम ङादाम उ मार्से निउ रो । हाराम्ब मुला ग्यालम बिबाम । ए थेम झन थारेङ का थे म्हि ब्राबा पुल ग्याम्सेन निउ रो । तिग लाउ तिग, तिला ताबा ताला तारेम बिसि ङा थे पुल ग्याम्सेन गासासा निजि । गुकि गुक्कि रेम्बोलोलासे जा म्हि ब्राबा म्राङ्ना म्राङ्नान तिग बाइक थोबा रो । सरि बिसि रुलुलु ब्रजि । क्याम्साङ दोजि ।
हान्डो हान्डो ख्वाराङ राङ ग्वाइ दिङ्बा राङ तासि निजि । तोर दोजि । नास्पति दोङकादेसे ङादा कोहोरो गि च्याचिजि । ङा नोन कोहोरोन गि निजि । थाङ्सिङला गुङ्नोन गुङ काक्लाङ कुक्लिङ्बा हान्डो दोजि । खाजिबाइ ग्लारि ढलान खाजिबाइ ग्लारि रसक बसक्पा ग्याम । दोतोबा दोखाङ ङामला गाङ च्याबान निजि । ग्यालमसे ङादा ङोजि । ङादम थे दोतोबा ग्लारि अबोर्नाम । म्हिकदे फुटबल क्लाङ्चिबा ग्लारिका बोर्सि अलपत्र ब्याङ थान्जि । लु ओम अनाम बिसि यप्पागि फुटबलदा ल्याक्पासे तोर रुल्बा मार रुल्बा लबाजा च्यचिजि । थे ग्याम थेरि मुबा म्हिदा ङाला समस्या सेबाम, खालाइसे क्यार्से निउ योना तला रो, खालाइसे चुपट्टिसे निउ योना दोला रो । हाल्ला जे ताम ङ्यान्से । म्हि दाङ्सेला ताम, ब्ले दाङ्सेला ग्याम बिबाराङ मान्जि ।
हलाइला ताम आङ्यान्न थे दोतोबा ग्ला च्यासि निबाम आच्या लिच्छारिम दोसितोगो हाबा ग्लापटिन का साङदोजिम । आ तारे जा आता होइ बिसि दोसि हाजि । देप्पेन तोगोला पुलरिम ओदेन म्हि । दोसि रेच्छागि चिजि । फो नोन ख्रेन्काजि, चिसि आता मान्सि थे पुल ग्यम्सेन हाजि । तोत्थाङ हासि झोलारि मुबा क्युइ प्युक स्यासि थुङ्जि ।
माने गाङरि हासि च्या बिस्कुट चाबाइ ओमनरि ताजिबा नेपाल थेन कतारला क्रिकेट च्याजि । नेपालसे २११ ला टार्गेट पिन्जी । लिच्छाला ओभररि नेपालला दिपेन्द्र सिङ ऐरिसे लगातार डु छ्क्का छेक्सि दोङराप सोजि । ङादाइ सेम ताङ्जि । ह्युल्ला गोबोनकदेसे प्लुत निना लाबा नादा क्रिकेट क्लाङ्खेनसे तोर ताना लजि । जम्बुलिङरि नेपालदा ङोसेना लाबा खेलाडिकदेदा थुचेच्छे ।
छार दिङ वि.सं. २०८१ गिक्छा रे ला दिनि वाप वाप तासि न्हुपरि गाल्गे लाजि । ङानोइ छार दिङरि, छार ग्लारि कोर्सि हाजि । दोतोबा दोखाङरि दोला आहाम्सा तिगाइ छार अनुभुति ताजि । चोदे ताम ह्राङ्निला ङोन्छाङरि थानम्याङ्जि । तिला ताजि ज्याबान ताजि ।
थे ज्योति पुखु गाङरि ताजिबा कन्सर्टला स्यबा च्याला आम्याङसाइ कोबा जा थेजि । ‘सोल्टिनि सोल्टिनि सेलोमा नचौन’ । थेरि ख्रुङ्चिबा दिगुसे फो अप्लिङ्साइ, थेला क्युइसे ओल्बोङ बाम्ला आम्याङ्साइ, थेला सिल्बा लाबासे क्रा ख्रेला आम्याङ्साइ । थे ग्याम ह्राङ्ला नाम्सा च्याला अम्याङ्साइ, सेमरि दुङाल आङाम्नि । ङाला नाम्सासे सातान च्याजिबा ज्योति पुखु गाङदाइ सेमरि तिगाइ अमानगो, दोसिला रे रि रुप तला बिसि हाजि ।
ह्राङ्निला रे ज्यबान ताजि तला ।तिलादाम्मान तसाइ । ह्राङ्नि बेनादान छार दिङसे छार छार उन्नति प्रगतिला गोङमा ङाच्छा लेबा बाङ स्यापकाइ, ज्याबामान्बा । लस्सो । थुचेछे ।
बागमती गा पा, ललितपुर
२०८१ वैशाख ०१ , शनिबार
