ज्याबा म्हाङ थोसि
नाम्सा ख्लासि
सहर वाङजि म्हेन्दोमाया !
सङ्गुलसे फुप्पा दिमनाम
स्होबादा टाङगा खाबारि
आपाआमाला लिरि
ताङबा दोसिन बाबारि
चाचा छ्युगु, मानमिन
आरेना छ्याम्बा लेरि
ब्रोइ काप्पारि तिगाइ
न्होर स्होबा म्हाङ थोबान
याम्बु साप्चि म्हेन्दोमाया !
याम्बु न्हाङरि म्हाङ्ला
पोरे थोसि साप्पा थेदा
गाप्चि याम्बुला
थाङ खाबा ठिमसे
न्होर खाबाला ग्याम
माइबान ब्रामा
ग्युर्जि याम्बुला
ठमेल बजाररि
थेला म्हाङ ह्रेबा
लाबुला साइरि ।
जामाहेन्दे !
डुङ्जि थेला
नाम्सा दोबा ग्याम
ब्रिगु थेन स्युगु आरेना
लोपखाङ निला आम्याङबा
ओन्छ्यान आलेआङाला दुङाल
ब्योङ्जि म्हेन्दो मायाला मिख्लिरि
सङ्गुलसे फुप्पा नाम्सा बइरागरि
क्रासिचिबा मुला म्हेन्दो माया !
ब्रान्बान
थाहा मुला थेदा
मानेगाङला माने फुप्पा
म्हेमेला लाखाङ छारछिर निबा
देप्पेन मानेछ्योर्तेन राप्ना लातोबा
तामाङ ठिमलान दिम स्होतोबा
म्हाङ मुला, सिबा आरे ।
तासाइ !
याम्बुसे ग्लोङ्बा थेला म्हाङ
छ्युगु बेबा नाङसालह्राङ
दिपदिप ताचिमा
देप्पेन
ग्युर्जि म्हेन्दोमायाला म्हाङ
बम्बाइला ङ्याल्वारि
दुङालला फाइदा किन्बान
छोङला स्हे स्होसि
ङ्याल्वारि दोना लाबा
म्हेन्दोमायाला क्राबा
थेबा कि आथेबा सरकार ?
जामे खाबा ग्यालम च्यासि
मि छाबा आपाआमाला
मिख्लि फ्याबा गे लाबा कि
आलाबा पाङगो सरकार ?
साङ्गुलसे गाराङ दोबा
नाम्साकादेरि देप्पेन दाज्र्यु
फेर्बारि पुङ्गो
म्हेन्दोमायाकादे थेन
थेनिला म्हाङकादे फर्ला
आम्याङनान साम्ला
थापुङ्गो सरकार ।
कोन्ज्योसोम गापा– २, बागरगाङ, ललितपुर ।