हाङसुम यारि छे छाङरि
चु डाजाङला गेताङरि
ख्राङगारि बिस्कुन सुन साङला
सानसिम स्युगो ङाइ पाङला
आम्बाम दोङरि टाम्बा नाइ
गोर्गिम तामसोर पाङला ङाइ
ङ्यान्सिम सान्सि दान्छ्यागो
तोर तोर मुरि दिङबा ग्वाइ
पाङगे ङासे गोर्नि ह्वाइ ।
छिमारि म्हेन्दो छिजि बिजि
म्हिसेम खालाङ निजि बिजि
नारानसिबा नारानसे
ङाला स्वास्थ्यला कारनसे
बोन्बोदा स्याङस्याङ लाखाजि
नारान सिबाइ आखाजि
ठाडोम स्योङदा पेरु चाम
दरेसे क्यारला मारलामि
स्यार्लाम गान्दि मेर्लामि
बुबाला दोङबो आर्खानि
दिमलाम धान्दासे अख्लानि
ह्रिरिम छाबा रा म्हेदा
ङा दुखिला जामेदा
धान्दासे खाइमाइ अख्लासाइ
दिमलाम धान्दा मार ब्याङसि
बोन्बोदा स्याङस्याङ ला खाबा
आदुब लासि ङा खाबा ।
आलुम दाप्पा डालोरि
उइमाइ माओबादि पालोरि
छिमारि म्हेन्दो छिमामि
कोलाकादे माओबादि निमामि
कमल आहिन कापिसे
थेहोइ पुलिस पापिसे
बोलिसे आहिन गोलिसे
गोलिसे तोजि काङ काङरि
छिमारि म्हेन्दो छिसिनम
ओत्ते लासि निसिनम
जिर्माम ग्वाइसि काबामि
युद्धरि लडप तमामि
गान्दिला बर्लाप स्योङला छाल
खाइ गादे निज्योइ काला बाल ।
बम्मइ काला भेलारि
थेनोन नारान बेलारि
सिम डप ल्हेबा सिमसिमरि
थे होइ नाम्सा दिमदिमरि
जिर्माम ग्वाइसि गाबामि
पुलिस आर्मि खामामि
मासिनोला क्वान्ख्यना
अम्माइ नारान ओन्छ्याना
तिङ साम्सि ब्राबा थेला गे
थे होइ नाम्सा दिमदिमरि
गादे चाजि स्याउला गादे चाजि छे ।
जिर्माम ग्वाइसि गाछिनम
होत्ते नारान तसिनम
तामाङ संस्था ठोङदासि
याम्बुम पोगोल वाङदासि
गोकर्नरि गोकामा चुदे दोना दोखमा
चु होइ ज्यार्दि बमानसे
सिम डप ल्हेबा सिमसिमरि
ह्याङलाम नाम्सा दिमदिमरि
चैतरि दुइबा ग्वा मुला
खारेरि चुङसि ह्वामुला
ख्राङगारि बिस्कुन साङमुला
ताच्यारि चुङसि नाङमुला
डुइबाम छोसे डुइसाइनोन
काङरि छेङसि पुइसाइनोन
चु होइ तामाङ ह्युलबासे
ह्वारारि थाङमा आसोनि
जत्तिन पाङसाइ आगोनि ।
फ्याङ्बम चरि चुङतोला
दोखाङरि दोबारि बिदासि
सन्चार कर्मिसे सुङतोला
ग्रान्बाला नागा साइबारि
ह्याङलान दोखाङ म्हाइबारि
दोखाङ दोना दोबारि
सुनला गोन्बो स्हेङतोजि
तामाङ ह्युल्बा डिक्तोजि
स्यारलाम गान्दि म्यारलामि
च्यागो दान्देसे क्यारलामि
थाबाला दोङबो बुडिसि
आजाइ टिसाम कुडिसि ।
ख्राङगारि बिस्कुन साङलावा
ह्याङलाइ याङताम याङलावा
राइरिम गोजा खेबारि
ह्याङसे क्वान्बा चु गोइलो
फिक्र्याप फिरि तेबारि
गोकर्नरि बोकाजि
तामाङ ह्याङला ह्युल्बाइनोन
युद्धरि लडप लादासि
सरकाररि तामाङ दोखजि
ह्याङलाइ याङताम बाबारि
ह्याङलाइ अधिकार ताबारि
सुनला गोन्बो स्हेङसिनम
तामाङ ह्युल्बा डिक्सिनम
सरकाररि बेनान निदोला ।
लिसंखुपाखार गापा–४, सिन्धुपाल्चोक
