बाङला ह्युलला दातेला वर्गफेबा समाजरि सोसक–सासक वर्ग, गम्भिर न्हाङलान संघर्सरि ब्लुम्सि दारे विनासला स्थितिरि राप्बा मुला । चुह्राङ लासि चु वर्ग विनासला स्थितिरि मुला तासाइ नोन मजदुर–किसान ह्युल्बाला गिक्खे क्रान्तिकारि आघात आलाते चु वर्गला मुतेबा विनास खाइमाइ सम्भव आरे । खात्मान दुइदोना चु क्रान्तिकारि आघात सम्भव आता, थे दुइदोना बाङला ह्युलला ह्यल्बाला कठिनाइजुगु ताङसे ल्हेसेला मुला, कानुनला स्थिति निरन्तर न्होङसेला मुला ओम अराजकताला दातेला चक्र ल्हेचिसेला मुला ।
साम्राज्यवादि शक्तिजुगुसे चु वर्गदा सोना लाबारि मुतेबा व्यवस्था आलाबा हिन्साम बाङला ह्युलला बुर्जूवा सासक वर्ग तिनि जुन संकटरि मुला, थे संकटसे तिनिदोमा जिन्छेला मुबा । साम्राज्यवादि शक्तिजुगु खातेबा दिङ ल्हानान ग्रेन छे पिन्सि तिलोगि सरकारला बार्सिक बजेट थेन विकासला गेताङजुगुला घाटादा पुर्ति लाला बिसाम तिलोगि ह्युल्बारि फेना लाबारि प्रतिक्रियाबादि ल्होलो सांस्कृतिक कर्मकान्ड नोन स्हेङबारि पुङला । सांस्कृतिक कर्मकान्डला आयोजनाजुगुला माध्यमग्याम साम्राज्यवादि शक्तिजुगु थेन थेला देसि दलाला मुतेबासे सामन्तबादि कुसंस्कार थेन धारनाजुगुदा ङ्हाच्छा बाचिबा मुला ओम थेदा दोसि सोना लाचिबा मुला । पाङनोन तोबा ताम तिला मुला बिसाम धर्मला मिनरि जुन कर्मकान्डजुगुदा थेनिकादे प्रत्यक्ष वा परोक्ष रुपग्याम उत्साहित लाचिबा मुला थे कर्मकान्डजुगुदा सुताइ धर्मलिब्रो बिसि ल्होलो धार्मिक म्हिजुगुसे थेला लिब्रो नोन लाबा मुला ।
मनोरन्जनला कादे ानध्यम मुला, थेफिरि प्रतिक्रियावादि शक्तिजुगुला एकाधिकार मुला । थेला संचालन थेनिकादे सुनियोजित ढङगग्याम्से लाचिबा मुला । सिनेमा, संगित, जात्रा, स्योस्योजुगु थेन रेडियो, टेलिभिजनला माध्यमग्याम मनोरन्जनला मिनरि ह्युल्बादा कादे पिन्चिबा मुला, थेग्याम्से ह्युल्बारि बिकृत आकांक्षाजुगुसे केवा पिन्चिबा मुला, जुन ह्युल्बाला वर्गृचेतनाला बिकास बाधक मुला । चुला अर्थ अनिबार्य परिनाम स्वरुप ह्युल्बा ब्यापक मात्रारि दिग्भ्रमित ताचिबा मुला ओम ह्राङला मुक्तिला लागि तोबा जन संग्रामदा संगठित लाबारि याङबा आरे । ह्युल्बादा चुह्राङ लासि लिच्छारिक्यार आङसि चिम्याङसाम देसि थेन बिदेसि सोसकजुगु थेन सासकजुगुला निहित स्वार्थजुगु पुर्ति ताला । सोसक वर्गजुगु ह्युल्बाफिरि सोसन–सासनला ताङ चलप लासि थान्बाला लागि ह्युल्बाला सोचफिरि नियन्त्रन थान्बा मुतेबा बिमा गिक्छा आवस्यक ताला बिबा गोमुला । ह्युल्बाला सोचफिरि नियन्त्रन थान्बा थेन्ना बाङ जुन दिन जिन्ना, थेनोन दिन थेन्ना वर्ग नोन जिन्छेला मुला । चु तथ्यदा सोसक–सासक वर्गजुगु ज्याना लासि सेबा मुला ओम चुसे सडयन्त्र स्वरुप थेनिकादे सांस्कृतिक कर्मकान्डजुगु आयोजित लाला, जुन कर्मकान्डजुगु देन्बारि आम ह्युल्बाला लिब्रोरि थेन्ना संघर्सलान याखारगि हिस्सा हिन्ना ।
चु वर्ग संघर्सला ठिक लिब्रो ह्युल्बासे नोन सोसक–सासक वर्गला ल्होलो कर्मकान्डजुगुदा भन्डाफोर लाबारि ओम थेला देन्बा ह्रिक्पादा उदघाटित लाबाला लागि ओम चु परिस्थितिदा मुतेबा ह्युल्बाला कर्तव्य निर्धारित लाबाला लागि याखारगि व्यापक सांस्कृतिक आन्दोलनला रुपरि याखारगि संघर्स संगठित लातोला । थेतासि सांस्कृतिक थुमरि अनिवार्य रुपग्याम्से ह्युल्बासे ह्राङला सक्रियता ल्हेना लातोसेला मुला । सोसक–सासक वर्गला प्रचार माध्यमजुगुला भन्डाफोरला छ्यामरि ह्युल्बाला सिर्जनसिल बाङजुगुदा संगठित लासि याखारगि छार प्रगतिसिल संस्कृतिला जग थान्तोसेला मुला ।
चु छार प्रगतिसिल संस्कृति, दातेला समाज–व्यवस्थादा पुर्नतया पोबाला लागि चलप ताचिबा संग्रामला याखारगि हिस्सा तासेला मुला । कारन, चुनोन प्रगतिसिल सांस्कृतिक आन्दोलनग्याम ह्युल्बाला सोचदा सोसक–सासक वर्गला नियन्त्रन ग्याम मुक्त लाबारि खाम्सेला मुला । सोसक–सासक वर्गला नियन्त्रनग्याम ह्युल्बाला सोचदा मुक्त लाबा नोन समाज पोबाला लडाइरि सफल तासेला ङ्हाच्छाला सर्त हिन्ना ।
(दो:बा : अगाध)
