आठ्वाङ्नान थान्बा डुङबा गिक्खे खाम मुबा
न्हाङरि तिला मुग्याम खाइ, माङग्यार ङालान मिन मुबा ।
अपराजिता,
एला खाजिबाइ सिर्जनाला लिच्छारिक्यार थुइबा हरफ हिन्ना चु । ब्रिखेन ललिजन रावलला गजलला प्लेनसे एला रचना सजाब लाबा मुबा ।
गजलला चुनोन प्लेन उदृत लाबान खालाइदा सम्बोधन लासि एसे ह्राङला सिर्जना चुह्राङ लासि ख्योल्बा मुला–
‘चु पत्र एला लागि एलान मिन ब्रिबा याखारगि बन्द खाम नोन हिन्ना । चु देन्बा घटनाला सुरुआत हिन्ना । ए छार्सिकेन निउ, ल्हेसिकेन निउ, सचेत तासिकेन निउ, चु पत्र एदान पुरस्कार ।’
एसे ‘ए’ बिसि सम्बोधन लाबा थे पात्र खाला मुबा ? खाला हिन्ना थे म्हि ः थेसे ह्राङदा सम्बोधन लासि ब्रिबा एला बन्द खाम ठ्वाङजि आठ्वाङनि ?
चु पत्रला गुङरिक्यार ल्हानान भाबुक मुबा एला उद्गार । युङबाग्याम ताइबा क्युइला होनह्राङबान चुह्राङ लासि ङ्हेला¬–
‘चु याखारगि देन्बा राप हिन्ना, लिच्छा एसे चुरि ह्राङला लि म्राङसेला मुला ओम म्राङसेला मुला थे टलपलप ताबा लिरि ह्राङला ङ्हाउ । बिबारि आखाम, चु ग्योइ थेन अभिब्यक्ति गोबा एला दिङ तामा ङा चु जाम्बुलिङरि तामु कि आतामु । तासाइ, ङादा बिस्वास मुला, ङा एला डान्बारि बिसाम निस्चित लिरि छोन्बो तासेला मुला । तिनिमि एसे ङाला मानसिक ङोसेबा याङजिन्बा आरे, एसे चोदे सेमुला कि ङा चु दिमला याखारगि प्रमुख म्हि हिन्ना, थेसे एदा मायाला कुरि आखिनान माया लाबा मुला ओम थेसे एदा पादाल नाङ आछेप्नान सजाय पिन्बा मुला । चु खाराङबा म्रिङकोला हिन्ना बिबा बिजासुलभ जिग्यासा एतेन मुसिम, तासाइ एसे पाङबारि आखाम । खाजिबा रे चु जिग्यासाला एजा फुइबा म्हाला, थे क्षन एदा उपहार । लाउ तिनिन चु पत्ररि ङाइ कागज लापिन्ना ।’
‘ओखर फोसि एदा ख्वाबारि आखाम्बा थेन ओखर फोसि ह्राङसेन चाबारि आखाम्बा ह्याङ ङ्हिलान साझा थेन अभव्य स्हु, थेकुनु ए पारदर्सि पर्दारि च्यासेला मुला । थेनोन बिन्दुरि एसे ङादा ह्राङनोन अनुभुति लासेला मुला, बिस्वास मुला एसे ङादा माया लासेला मुला । चु पत्र एला लागि हाडे ओखर बिले याखारगि डुङबा खाम ।’
चुनोन एला सिर्जना हिन्ना । बिले, ‘पारिजातला पत्र गुन्जनला मिनरि’ मुबा रचना हिन्ना । दुङलला ताम, खाराङ लासि हिन्ना एला पोप्बा रचनारि पोप आतानिम, ख्लाजिम । चु पत्र ‘गोधुलि’ मिनला लाब्लिला ग्योइकाइ संकलनरि २०४९ दिङरि छिपाला चिम । एला पोप्बा रचना दोसि छिपाला तासाम चु रचना अबस्य तेसेला मुला ।
गुन्जन हिन्ना थेला मिन । एसेन न्वारान लापिन्बा । थेदा दिमरि बाबा ल्हानान रहरए एलान हिन्ना । ओम, युपिन्बा हिन्ना ङाला कुरि थेन लामाजिला ज्याबा संरक्षनरि ।
क्योङलान चेकाइ थेसे जाजन मुमा एला डान्बारि ह्राङला उद्गार ल्हुसि ब्रिबा मुला । थेदा आमासे आउदिन माया लाबाला नोन मुबा । तासाइ, आउदिन रङ थुङबा आपाला बानितेन दिक्क तासि रेगि ताङग्याम मुतेबा आइराक नोन ख्लुपपिन्मुबा थेसे ।
आपासे टोलनाङला बिजाबुमोजुगु ह्रुप्सि दिमरि बासि माया पिन्मा थेदा बोमो खामुबा । तिहाररि राटेपिङ युपिन्मा थेला मिरि ताङबाला लहर म्राङमुबा ।
थे एदा ‘पु’ बिसि सम्बोधन लामुबा । थेदा ज्योज्यो, ज्योज्योला ह्रो थेन थेसे जेक्खे एदा पु बिसि सम्बोधन लामुमा । तासाइ चु मिन तिनिदोना थेनिकादेला सुङफिरि थोन्चिला ।
‘पु’ मिनलाइ नोन याखारगि सेमछुबा राप मुला ।
ओम, थेदा से तामा आपाला करसे रेदाङसे ङिस रेदोना नुहाब लामा थे छावासे ग्रस्त ताबा मुबा । कान्ति अस्पताल छ्योङतोबा आमाला गे ल्हेबा मुबा । थेदा लाइनु मुमा पिन्तोबा सुइजुगु पिन्बाला आरेबा चिम । सायद थेलान असर तातोला, थेदा छावा खाबा । लिच्छा निसि चु बिधिजुगु छ्योना लाजि ओम उपचार नोन लाजि ।
थे कक्षाकोठारि डोचिबा दुइरि नोन आपादा तिलाइ तामला हतार तामुबा । म्याडमला अनुमति किन्सि कक्षाग्याम माङग्यार ङ्होइसि होटलग्याम बाबा मम योनायोना ख्वाबा थेला आपाला मायाला ङोसेबा मुबा । सायद म्लेबा आरे थेसे ।
बानि ताना लाबारि योरिक्यार ट्वाइलेटला प्यानरि थान्मा थे तिर्याम पाप्सिमाम प्यान न्हाङरिन वाङजि ओम लोङसि क्राजि । क्राबा थेसि ‘पु’ क्रिङबा मुबा, ‘गुन्जेदा प्यानग्याम तेपिन्गोले, थेरि खाला मुलाइ मुला बिसाम !’
चु ब्राबारि आखाम्बा ‘पु’ला तान्तारला पुकार हिन्ना ।
हिन्ना, प्यानग्याम माङग्यार तेबारि तिलाइ दुइ ल्हागतिबा निस्चय हिन्ना । कारन क्याच्चा दिम निबा आमा जाकि गाइना लासि दोकाबा मुबा ।
चुह्राङबान मुबा डान्बा तरङजुगु ।
गुन्जे दारम ग्रेन ताजिन्जि ताला, खानाङ मुसिम, थाहा आरे । आत्मबिस्वासला फ्युक्पो थेन आलोङबा स्वभाबला गुन्जेसे दुङाला याङसेला आरे, चु निस्चय हिन्ना ।
तसाइ याखारगि जिज्ञासा– ‘पु’कि ‘गुन्जे’से ह्राङला मिनला बन्द खाम ठ्वाङजि कि आठ्वाङनि ?
