रुसला राजधानि मस्कोरि ङाला सेमनिबा बिले ङेङ्गोर तिलादाम्मान डान्साइ रुसि नागरिक पाबेल मुला । ओसो दुइ थेन मौकाला फुर्सदरि कोर्ला ।
तिनि नोन पाबेल ङा मुबा ग्लारि खाजि ओम बिजि, ‘ए ह्रो ! ङातेन तिलाइ रुबल मुला ब्राउ खानाङए रेस्टुरेन्टरि रमाइलो लासि चाइ ।’
ङाइए नोन थेला ताम आङ्यान्बारि आखाम्नि ओम ङ्हि नोन याखारगि रेस्टुरेन्टरि निजि ।
सुमधुर भ्वाइलिनला मन्त्रमुग्ध ताना लाबा काइजुगु ङ्ह्याचिबा मुबा । ङान्छे चाबास्हेजुगु ह्रिजि । पाउरोटि थेन चिया नोन आफेनि ।
पाबेल ग्लेठिम थेन ग्योइकाइरि ओतेबान सेम पिन्बा रुसि ब्योन हिन्ना । ङाजा बिसेस ग्योइकाइरि सेम पिन्बा ताबासे ह्रापह्रुपरि जाकि ल्हाना ग्योइकाइला ताम ज्याना लासि लाबा लामुबा । रुसि ग्योइकाइब्रिखेन अन्तोन चेखब, माक्सिम गोर्किजुगुला ताम ताबा लामुबा । ग्योइकाइला ताम लामा दुइला ख्याल नोन आताबा ।
चिया छेङ्बान पाबेलसे ङ्योइजि, ‘खाम हाङ ! तिलाइ ङ्योइगो ?’
ङाइ देबा लिरि अनुमति पिन्सि बिजि, ‘तिला हिन्ना थेह्राङ्बा लाउ ङ्योइसाइ ताला ।’
पाबेलसे ङ्योइजि, ‘एला ह्युलला मुतेबा बिभागिय लोन्बोजुगु ङोसेला ?’
थेला ङ्योइबासे लामा ङा हाथोम्सि सौचालयला निउ लासि माङ्ग्यार थोन्जि । तामसोर च्यासि माङग्यार थोन्माहेन्से लोन्बोजुगुला मिन पाङ्जि ।
लिच्छा तिलाइ रुबल पाबेल थेन लेङ्बा ङाइ फासि माङ्ग्यार थोन्जि । ङाइ सेमसेमरि ङ्योइजि, ‘खाइमादोना चलप ताला होइ चुह्राङ्बा जात्रा, लिच्छारि !’ (दोबा ः अगाध)