नरेला पिलेन टिकट

‘लु होइ साम्पाङ कान्छा नरुइकिन बसो है पिछे त भेट्छुङ भेट्दुङन आसेबारो’ नरेसे साम्पाङ कान्छादा फ्यालाबान पाङजि । ‘लु बस्नेलाई माटो हिडनेलाई बाटो लेखन्तै यस्तो पो ।’ च्याङबासे नोन दुखमन लाजि । स्यान्दो रे बिमा जाकि मुएन दोपदोप तामुला । बेलडागि सिबिर नं. ४ । नाख्ले तेबा दो । गोरसोमते मोजे दोङ । ताङ स्याल्बा जाजुबा खाट । दिमसोमला साजे कल । नरिवल दोङ टाला क्युइ डुइबा कल । पुरानो ताजि । चेसे चासि आम्सि जिन्बाला । थेन्ला दिम सिबिररि चिबाकादे मोक्कोनला चुराङबान । खालाइदा फरक आरे । छाङमानला दिमएन समान, दुङालएन समान । म्हि फरक दु समान । छाङमानला ओराङबान ।

नरेला म्रिङमाइला मिन सोममाया तामाङ । क्यार फुन्चोकरिक्यार रुपतासि ब्याहा लाबा रो । जामे गिकला आमा । नेबानेबा कदला हट्टाकट्टा म्रिङकोला । सुनकेस्राला आमा । थेन नरे भुटानरिन रुप तामुबा रो । ग्लागिरिन गेलाबा ताङरिन रुपताबा । सेम डिक्चि । सेम छुजि । जोडि खिजि । सेम छुबाला ग्लाला माया प्रेम । भुटानि साप्रा नेपालि माया । मायाला ब्लु सुनकेस्रा याङजि । भुटानि आन्दोलनला लाबालुङसुरसे मुदेबान नेपालिकादे फ्याङते छ्योङजि । सरकारसे ताप्सि क्योङसेन भुटान ख्लाजि । मेचि पुल वाइसि नेपाल वाङजि । नेपालरि सिविररि थान्जि । थेनिला सिविर नं. ४ । तिनिन्हाङगार लानालानान दिम सोम वाङजि । तिलाइ दुइलिच्छा थेन्दा आइओएमसे च्याजि । सरनार्थिजुगुदा संयुक्तरास्ट्रसंघसे व्यवस्थापन लाजि । नेपाल सरकारसे ह्रोजेक्खेन लाजि ।

फुन्छोलिङ गाङरि सताह्राङबान दिनि फेबा मुला । योला चियानास्ता ताबान मुबा । च्याङबा लामा, रिट्ठे दमाइ, जोगे धिमाल, लुते सापकोटा थेन मरिचे राइ ख्राङगारि पोपसि चिया थुङबान मुबा । तिनिन्हाङगार चु नाम्सारि हालचाल आज्याना न्होङजि । क्यारमार ब्रामा सुताइ नेपालिदा दुङाल नोन दुङाल मुला । तिला लासे आखेम्हेमेला ग्ला ख्लासि चुरि खाजि । तोरएन निआखाम्बा मारएन निआखाम्बा ताना लाजि । तोरछ्योङ मारछ्योङ लाना लानान सरकारसे स्युर्गे लाबान मुला । सिबा बिमामि ह्यार्सिन डाला ताला । दारेम ख्लाबारिन ज्याबा ताला । क्योङसेन फुन्छोलिङ ख्लाबा ग्रोइ लाजि । चुदेला दुङाल कमाइ, नाता, गोता, जातुकुला पढाइ, जागिर, छोङ छाङमान ख्लातोजि । चुदेन ग्रोइ लासि न्हाङगार दाङसे गोकागार पोरे नासि दिम ख्लाजि । मरिचेसे डान्बान पाङजि । ङान्नाम थेरि बु ह्वारि मुबा । जाजामेला पढाइ मुबा । जागिर, छोङ थेन स्यान्दोगादे मुबा । छाङमान ख्लासि ह्यार्तोजि । आहिन्साम सितोबा का । ल्हुइ बिमा सम्पति ग्रेन आहिन्बा टिम । ङानि ह्यार्सि खातोजि । रिट्ठे दमाइलाएन दिम ह्वारि थेन मुइ मामा ओस्सोन ख्लासि खाबा डान्जि । तिलाइ किनआम्याङनि ।

नेपालरि खाबा लिच्छा सिविरला चोकचोकरि डान्सि डान्सि क्राबाजे ताजि । ओत्थेबा फ्युक्पो बुदुने माझिसे सिविरला गोरगिक छाप्रो याङजि । चाबाएन आरे । थुङबाएन आरे । चासाइ आचासाइ साता सातारि युएनसे जुबा उसिना सित, पाकेट नाङ चाजा, लिटरसोम केरोसिन थेन खद्रला क्वान । ओदेजेन हिन्ना ङान्ना दैनिकि । लाइन चिबा ताबा चाबा चिबा । चोकरि थोन्साइ सरनार्थि खाजि बिसि ङोबा लाजि । भुटानसे खाराङ लासि ताप्पा बिबा ङ्योइबा जेक्खेन । ङान्लाम मिन नोन म्हाजि । भुटानरि नेपालि बिमुबा । नेपालरि भुटानि सरनार्थि बिमुला । नेपालरिन सरनार्थि दोतोजि । आले च्याङबासे दुङाल म्हान्बान पाङजि । छुकछुक लाजि । खानाङला म्हि खानाङ दोजि ।

ह्याङदा मि दारेम चु बेलडागिला सिबिरग्याम्से नोन ताप्बान मुला रो । तेस्रो मुलुक ताप्पा रो । ङ्होरि मुसागा बोरि थोप्से । ‘बर्मा गयो कर्मसंगै नेपाल आयो कपालसंगै’ बिबा ह्राङ ताजि । का टाङबाला चाङगाह्राङ ताजि । चिबा ग्लाएन आरे निबा ग्लाएन आतानि । भुटानला केबा अमेरिकारि दुर्सा तासेला ताजि । म्हि म्हि आतानि । प्योक्सि ब्याङबा लाबुह्राङ ताजि । बा ताइबाला चु ल्हुइसे दारेम खाइमाइ हराभरा ताबारि आखाम । ह्याङला सा थेन ह्याङला थोपथाङ दारेम मिसारि जेक्खेन परिनत तासेला म्राङजि । आन्दोलनसे वारपार ताबारि आखाम्नि । टेकनाथ रिजाल सरदाएन ह्रोलाबारि आखाम्नि । आमा फुन्छोलिङरि, आपा बेलडागिरि जाजामे मेरिल्यान्डरि तासेला ताजि । तिरेला चु ल्हुइ । आसिना सिबाह्राङ ताना लाजि । तिल्मा दोना ह्याङ म्हि मुबा । दिम मुबा । मिन मुबा । स्वाभिमान मुबा । साप्रा मुबा । मुतेबान छाङमान भुटानरि ख्लातोजि । आखे म्हेमेला सा नेपालएन खाइमादोनादा थाहा आरे । सिविर रुङबा चिबा । चुतेन ताजि ह्याङला ङोसेबा । साइला कामिसे डान्जि । ओन्छाङरि तिगाइ आरे । छाङमान ख्लाजि । दारेम छाङमान म्हाङह्राङबागा दोजि ।

तिल्मा ङ्यासेला ताम हिन्ना होइ साजि १५५ नम्बर सिविररि युएनला गाडि खामुबा । कुइरेजुगुसे गोकागार फाराम ख्लासि निमुला । नरेला पिलेन टिकटएन बासि खाबाला चिम । अमेरिका बोर्ला रो । २५ तारेखला फ्लाइट रो । सिता मगर थेन निता छेत्रिएन छ्यामनोन बोर्ला रो । दारेम थेनसेएन ह्याङदा ख्लासेला ताजि । ह्याङलाम कर्मन खोटि चिम । दारेम खाइमादोना चुरि थान्बा तिगाइ थाहा आरे । सार्कि च्याङबासे पाङजि । न्हाङगारदाङसे युएनला गाडि खाजि । खाइ नरेदा किन्खाबा चिम । सिविररि आपा, आमा तिङमाइ मनमाया थेन जामे थेन नरे फेसि निलाबा हिन्ना । युएनसे फेना लाबा । भुटान दोसि निबा वातावरन आडिक्नि । नेपालरि थान्सि जेक्खेनएन आतानि । युएन एच आरसिसे अमेरिका बोर्बा प्लान स्हेङजि । नरेलाएन नम्बर खाजि । अमेरिका बोर्सेला ताजि । सिविरला छाङमान रुप तासि बिदाइ लाबा तयारि लाजि । मन्डले तामाङसे कोम्हेन्दो ख्यापपिन्जि । बिदाइरि छाङमान रुप ताजि । रुन्चे चोकरि लादाङसेन चुह्राङबा बिदाइ ताबान खामुला । नियमित रुटिङ ह्राङबान बिदाइ ताबान खामुला । नियमित रुटिङ ह्राङबान ताबा मुला । रुन्चे चोकसे नरेदा नोन बिदाइ लाजि ।